Monday, December 20, 2010

Best Actor (6/10)

Best Actor/Malayalam/2010/Drama-Comedy/IMDB(6/10)

പ്ലോട്ട് : ഒരു സിനിമാപ്രാന്തൻ ആയ സ്കൂൾമാഷ് സിനിമാ നടനാവാൻ നടക്കുന്നതാണു സിനിമയുടെ കഥ. അങ്ങാർക്ക് ഭാര്യേം കുട്ടീം ഒക്കെ ഉണ്ട്, പക്ഷെ സിനിമയിൽ അഭിനയിക്കണം എന്ന ആഗ്രഹത്തിനു അവരെക്കാളൊക്കെ സ്ഥാനം അയാൾ കൊടുക്കുന്നുണ്ട് .. ബാക്കി എല്ലാം സാദാ സിനിമകളെ പോലെ, സംവിധായകർ ആട്ടി ഓടിക്കുന്നു, അയാൾ കിട്ടിയേക്കാവുന്ന ഒരു പടത്തിലെ റോളിനു എക്സ്പീരിയൻസ് ഉണ്ടാക്കാനായി കൊച്ചിയിലെത്തുന്നു, ഗുണ്ടകളുടെ കൂടെ താമസിച്ച് അവരുടെ രീതികൾ പഠിക്കാൻ. ..  പിന്നെ കോറേ തമാശകൾ, വളിപ്പുകൾ, .. അവസാനം ഒരുഗ്രൻ ട്വിസ്റ്റ്, അതിലും ഉഗ്രൻ ക്ലൈമാക്സ്.


വെർഡിക്ട് : സിനിമ ക്ലൈമാക്സ് ഒഴിവാക്കി നോക്കിയാൽ തികച്ചും ആവറേജ് ആണു.ചുമ്മാ കൈയ്യടി വാങ്ങാൻ സ്ഥിരം വളിപ്പുകളും, തമാശകളും ഒക്കെയായിട്ട് മുന്നോട്ട് പോവുന്ന കഥപറച്ചിൽ. അസ്വാഭാവികങ്ങളായ സ്വഭാവമാറ്റങ്ങൾ മമ്മൂട്ടിയുടെ കഥാ‍പാത്രത്തിന്റെ ബേസിക്ക് സ്വഭാവത്തിൽ കാണികൾക്ക് സംശയം ഉണ്ടാക്കുന്നുണ്ട്, അതു ഒഴിവാക്കാമായിരുന്നു. ഒരിക്കലും ഒരു പാവം സ്കൂൾമാഷ് കൊച്ചീലെ തടിമാടൻ ക്വട്ടേഷൻ‌ടീമുകളോട് ഉരസില്ല, അതും ഇന്നലെ പരിചയപ്പെട്ട ഗുണ്ടകൾക്ക് വേണ്ടി.!  അതു കഥയിലെ തെറ്റ്. !

മമ്മൂട്ടി ഒരു നാട്ടിൻ‌പുറത്തെ മാഷിന്റെ എല്ലാ മാനറിസങ്ങളും പ്രകടിപ്പിക്കാൻ ശ്രമിച്ചിട്ടുണ്ട്, അതു ഒരു നല്ല പരിധിവരെ നന്നായിട്ടും ഉണ്ട്. ലാലിനു സ്വന്തം റോൾ ഇനിയും വളരേ അധികം നന്നാക്കാനുള്ള സ്കോപ്പ് ഉണ്ടായിരുന്നു, പക്ഷെ ഓവറാക്കി. സലിംകുമാർ വൃത്തികേടാക്കിയിട്ടില്ല. വിനായകൻ ചെറുതെങ്കിലും നല്ലോരു റോൾ നന്നാക്കിയിട്ടുണ്ട്. ശ്രദ്ധിക്കപ്പെടാൻ അദ്ദേഹത്തിനു നന്നായി അറിയാം. നെടുമുടി വെറുതേ വന്നു പോവുന്നുണ്ട് - ചുമ്മാ സെന്റി അടീക്കാൻ ശ്രമിച്ച് പരാജയപ്പെടുന്നുണ്ട്. ശ്രീനിവാസനും ഒരു ചലനം ഉണ്ടാക്കാനാവാതെ വന്നു പോവുന്നു. സ്പെഷ്യൽ അപ്പിയറൻസ് നടത്തുന്ന ലാൽജോസ്, രഞ്ജിത്ത് എന്നിവർ ഇവരെക്കാൾ ഒക്കെ നന്നായിട്ട് ചേയ്യുന്നുണ്ട് റോളൂകൾ. :)

മേഘമൽഹാറിൽ ക്യാമറാമാൻ ആയിട്ട് ബിജുമേനോന്റെ കൂടെ നടക്കുന്ന പയ്യൻ (ഹിപ്പി സ്റ്റൈൽ) : ഇതിലും ഉണ്ട് : അദ്ദേഹത്തിനെന്തേ നല്ല റോളുകൾ ആരും കൊടുക്കാത്തേ? അങ്ങാരു ഏതു റോളും ഉഗ്രൻ ആക്കുന്നുണ്ടല്ലോ? കുറച്ച് കൂടെ പ്രാധാന്യമുള്ള റോളുകൾ അങ്ങാർക്ക് ആരെങ്കിലും കൊടുത്തിരുന്നെങ്കിൽ..  നല്ല സ്വാ‍ഭാവിക ഡയലോഗ് ഡെലിവറി അങ്ങാരെ വ്യത്യസ്ഥനാക്കി നിർത്തുന്നു, എല്ലാവരിലും ഇടയിൽ. മേഘമൽഹാറിലും ഞാൻ ഇങ്ങാരെ ശ്രദ്ധിച്ചിരുന്നു..

സംവിധായകൻ : ഒരു കാര്യം ഉറപ്പ് - ഈ പുതുമുഖ സംവിധായകൻ ഒരു വാഗ്ദാനം ആണു, മലയാള സിനിമക്ക്. കൊള്ളാം, ആദ്യ സിനിമയുടെ ഒരു വിറവൽ ഇല്ലാതെ ഒരു സൂപ്പർ നായകനെ ഇൻ‌ട്രോ ചേയ്തു കൊണ്ടുവരുന്നതും, നായകന്റെ ബിൽഡപ്പും, ഒക്കെ, വളരേ നന്നാക്കിയിട്ടുണ്ട്. ടെക്ക്നിക്കൽ ഡിവിഷൻ ആണു ഈ സിനിമയെ ‘മോശ‘ത്തിൽ നിന്നും ‘തരക്കേടില്ലാ’ത്തത് എന്ന നിലവാരത്തിൽ എത്തിക്കുന്നതെന്നു പറഞ്ഞാൽ അതു ഒരു തെറ്റാവില്ല.

വാൽക്കഷ്ണം :  ക്ലൈമാക്സിനെ കുറിച്ച് പറഞ്ഞല്ലോ - അതൊരു ഉഗ്രൻ ഐറ്റം ആണുട്ടോ. :) ഇഷ്ടായി. ആ ഒരു ക്ലൈമാക്സ് ഇല്ലായിരുന്നുവെങ്കിൽ, ഈ സിനിമ ‘സൂപ്പർസ്റ്റാർ ചവർ’ എന്ന ലിസ്റ്റിൽ സ്ഥാനം പിടിച്ചേനേ. ആ ക്ലൈമാക്സ് ഇട്ടതിനു, കഥാകൃത്ത്/തിരക്കഥാകൃത്ത്/സംവിധായക ത്രയങ്ങൾക്ക് എല്ലാ കൈയ്യടികളും. :)

വെർഡിക്ട് ഒറ്റ വാക്കിൽ  : ആവറേജ്, ബട്ട് സഹിക്കബിൾ. :)


Sunday, December 19, 2010

കാണ്ഡഹാർ - Kandahar (2/10)


Kandahar/Malayalam/2010/Action-War/Wiki(2.0/10)

പ്ലോട്ട് : സംവിധാനം അറിയില്ലാത്ത മേജർ രവി എന്ന അമച്വർ സംവിധായകനു ഷൈൻ ചേയ്യാൻ ഉള്ള ഒരു പ്ലോട്ട്. സംവിധാനം കൂടാതെ അങ്ങാരു ഇതിൽ അഭിനയവും ചേയ്തിട്ടുണ്ട്. 

എയർ ഇന്ത്യ വിമാനം തട്ടിക്കൊണ്ട് പോവുന്ന വിമാനം തിരിച്ച് പിടിക്കുന്ന കമാൻണ്ടോകളുടെ കഥ പറയാൻ ‘ശ്രമിക്കുക’  യാണു ഈ സിനിമയിലൂടെ ‘സംവിധായകൻ’ . 

വെർഡിക്ട് : ചവറ്!  വേസ്റ്റ്! വധം ! ട്രാഷ് !
ഞാൻ കുറച്ചധികം കാലമായി ഇത്രയും ബോറും തല്ലിപ്പൊളിയുമായ ഒരു സിനിമ കണ്ടിട്ടില്ല.  കഥ ഒന്നും ഇല്ലായെങ്കിൽ പോലും - കഥയെന്നൊരു സാധനം ലാലേട്ടന്റെ സിനിമകളിൽ കണ്ടിട്ട് വർഷങ്ങൾ പലതായി, എന്നാലും, - ഒരു ത്രെഡ് ഇത്രേം അമച്വർ ആയിട്ട് ഉണ്ടാക്കി, അതു ഇത്രേം വലിയ താരങ്ങളെ കൂട്ട് പിടീച്ച് ഇറക്കണമെങ്കിൽ ചില്ലറ തൊലിക്കട്ടിയും പാദസേവയും ചേയ്താൽ പോരാ.!   പോക്കിരിരാജ ഒക്കെ ഇതിനോട് അപേക്ഷിച്ച് നോക്കിയാൽ ക്ലാസ്സ് പടമാണു!

ലാലേട്ടൻ - അത്ര മെച്ചം ആയിട്ടില്ല - ഇതിലും ഒക്കെ നന്നായിട്ട് പല സിനിമകളിലും ലാലേട്ടനെ കണ്ടിട്ടുണ്ട്, പക്ഷെ പ്രകടനം നടത്താൻ വല്ലതും ഉണ്ടെങ്കിൽ അല്ലേ പ്രകടീപ്പിക്കാൻ പറ്റൂ? സത്യത്തിൽ സ്കോപ്പില്ലാത്ത ഈ പടം ലാലേട്ടൻ എന്ന നടന്റെ ചിറകുകൾ കെട്ടിയിരിക്കുന്നു എന്നു തോന്നി .. അതു അദ്ദേഹത്തിനു തന്നെ അറിയാമായിരുന്നിരിക്കണം - പല ഷോട്ടുകളിലും ലാലേട്ടൻ ഉറക്കത്തിൽ നിന്നും എഴുന്നേറ്റ് വന്നു അഭിനയിച്ച മാതിരി തോന്നി.

എന്റെ ലാലേട്ടാ, എന്തിനു ഈ മേജറിനു തുരുതുരാ ഡേറ്റ്സ് കൊടൂക്കുന്നു? തനിക്ക് സംവിധാനപ്പണി അറിയില്ലാ എന്നു കഴിഞ്ഞ മൂന്നു പടങ്ങളായി വീണ്ടും വീണ്ടും അദ്ദേഹം തെളിയിച്ചു കൊണ്ടിരിക്കുകയല്ലേ? എന്നിട്ട് എന്തിനു വീണ്ടും?  ഹൊ .. കരയാൻ തോന്നുന്നു എനിക്ക്. :(   അദ്ദേഹത്തിനു ഡേറ്റ് കൊടുത്തില്ലായെങ്കിൽ ലെഫ്:കേണൽ പദവി എടുത്ത് കളയുമെന്നോ മറ്റോ അങ്ങാരു ഭീഷണിപ്പെടുത്തുന്നുണ്ടോ? ഞങ്ങൾ ഇടപെടണോ?

അമിതാബ് ബച്ചൻ : ഇങ്ങാരു ഈ സിനിമയിൽ മര്യാദക്ക് വന്നു പോവുന്നുണ്ട് - ഗസ്റ്റ് അപ്പിയറൻസ് ആണെങ്കിലും,ആകെ രണ്ടോ മൂന്നോ സീനുകളിലേ ഉള്ളൂ എങ്കിലും, ആ പ്രഭാവം നമുക്ക് ആദ്യാവസാനം അനുഭവപ്പെടുന്നു - അതാണു സ്ക്രീൻ പ്രസൻസ്! :)

പക്ഷെ, അങ്ങ് വടക്ക് കിടന്നു, ഇവിടത്തെ നല്ല സിനിമകൾ മാത്രം കണ്ട് മലയാള സിനിമയെന്നാൽ എന്തോ അതിഭയങ്കര-ഭീകര സംഭവമാണെന്നു തെറ്റിദ്ധരിച്ച് മൂഡസ്വർഗ്ഗത്തിൽ കഴിഞ്ഞിരുന്ന ബച്ചനെ എന്തിനു മേജർ രവി സാർ, താങ്കൾ സ്വന്തം ചവറ് പടത്തിൽ അഭിനയിക്കാൻ കൊണ്ടു വന്നു? താങ്കൾക്കറിയില്ലേ, താങ്കളുടെ ലിമിറ്റ്സ്? താങ്കളുടെ കഴിവുകേടുകൾ?
എന്തിനു മലയാള പടം ഇങ്ങനെ പൊട്ട ആണെന്ന് അങ്ങാരേം കൂടെ മനസ്സിലാക്കിക്കൊടുത്തു? എന്തിനു ? എന്റെ പത്ത് ഇരുന്നൂറ് രൂപ പോയതിൽ അല്ല, പക്ഷെ മലയാളസിനിമയിൽ ഇങ്ങനേം സിനിമകൾ ഉണ്ടാവുന്നുണ്ട് എന്നു അങ്ങാരെ അറിയിച്ച് മലയാളസിനിമയെ, മലയാളത്തെ മൊത്തം നാണംകെടുത്തിയതിനു താങ്കൾക്ക് മാപ്പില്ല. ഒട്ടും മാപ്പില്ല. ഷേം, രവി സാർ, ഷേം.! :(

ഡയലോഗുകൾ : രാഷ്ട്ര സ്നേഹം ഡബ്ബിൾ ഓവർഡോസിൽ ഇട്ട് ഉണ്ടാക്കിയ പല ഡയലോഗുകളും കൂവൽ ക്ഷണിച്ച് വാങ്ങുന്നുണ്ട് ഈ സിനിമയിൽ. ആവറേജ് മുസ്ലീം വീട്ടമ്മയുടെ ദേശഭക്തി ഘോഷണങ്ങൾ കേൾപ്പിക്കുവാനായിട്ട് മാത്രം കൊണ്ടുവന്ന കെ പി എസ് സി ലളിതക്ക് വരെ സ്കൂൾതല സ്കിറ്റുകളിൽ കേൾക്കുന്നതിനെക്കാൾ ദയനീയ ഡയലോഗുകൾ കൊടുത്ത് ഡയലോഗ് എഴുതിയാൾ തന്റെ ജോലി ഭംഗിയായിട്ട് നശിപ്പിച്ചിട്ടുണ്ട്. ഏതു റോളും ഭംഗിയാക്കാൻ വിദദ്ധയായ ലളിതച്ചേച്ചിക്ക് വരെ അടിതെറ്റുന്നെങ്കിൽ, എന്തോക്കെയോ പ്രശ്നം അടിത്തറക്കുണ്ട്, അതുറപ്പ്.!

ബാക്കി വരുന്ന എല്ലാവരും, കെ പി എസ് സി ലളിത ഉൾപ്പെടെ, അലമ്പാക്കിയിട്ടുണ്ട്. അമച്വർ നാടകങ്ങളിൽ പോലും ഇതിലും നല്ല പ്രകടനങ്ങൾ നമുക്ക് കാണാനാവും - ഇതു ക്യാമറാ ആംഗിളിന്റേ പ്രശ്നമോ, അതോ സംവിധായകന്റെ പരിചയക്കുറവോ കാരണം മഹാ ബോർ ആയിരിക്കുന്നു പല രംഗങ്ങളും.

ഡോണ്മാക്സ് എന്ന ന്യൂജനറേഷൻ എഡിറ്റിങ്ങ് വിദദ്ധൻ കൂടെ ഈ സിനിമയിൽ ഇല്ലായിരുന്നുവെങ്കിൽ - എന്റെ സിനിമാ-കാഴ്ചജീവിതത്തിലെ ഏറ്റവും വലിയ ദുരന്തം ആയി മാറിയേനേ ഈ സിനിമ. തീയറ്ററിൽ നിന്നും ഒരു കോമ ആകാതെ രക്ഷപ്പെടൂത്തിയതിനു ഡോൺ മാക്സിനോട് എന്റെ നന്ദി. !

വാൽക്കഷ്ണങ്ങൾ  : സുനിൽ ഷെട്ടി, പാർവ്വതി ഓമനക്കുട്ടൻ, സൂര്യ .. എന്നിവർ ഒക്കെ ഈ സിനിമയിൽ ഉണ്ടെന്നു വിക്കിയിലും നെറ്റിലെ പല ആർട്ടിക്കിൾസിലും കണ്ട പേരുകൾ ആണു. എവിടെ ഇവരൊക്കെ? ഇത്രേം കച്ചറ ആണെന്ന് അറിഞ്ഞ് അവസാന നിമിഷം എസ്കേപ്പ് ആ‍യതാണോ ഇവരൊക്കേ? 


ആകെ സിനിമ 2 മണിക്കൂർ ആയിരുന്നു കഷ്ടിച്ച് ഉണ്ടായിരുന്നതു. ഇടക്ക് എന്തോ മിസ്സിങ്ങ് എനിക്കനുഭവപ്പെട്ടു, സിനിമാ തീയറ്ററുകാർ കൊറേ ഭാഗങ്ങൾ കൂവൽ ഒഴിവാക്കൻ വെട്ടിനിരത്തിയോ?  എങ്കിൽ അവർക്ക് ആവണം ഏറ്റവും ക്രിയേറ്റീവ് എഡിറ്റിങ്ങിനുള്ള ഇത്തവണത്തെ അവാർഡ് കൊടുക്കേണ്ടത്.

രാംഗോപാൽ വർമ്മയുടെ പൊട്ട-ആഗിൽ കൊണ്ടെ അഭിനയിപ്പിച്ച് നാണം കെടുത്തിയതിനു പകരം വീട്ടാനായിരിക്കും ബച്ചനെ ഇങ്ങോട്ട് ഈ സിനിമയിൽ അഭിനയിക്കാൻ ലാലേട്ടൻ  കൊണ്ടുവന്നത്? 
ആണെങ്കിൽ, റബ്ബർ വച്ച പെൻസിൽ എടുത്ത സഹപാഠിയുടെ തലവെട്ടി പകരം വീട്ടുന്നതു പോലെത്തെ പരിപാടിയായിപ്പോയി ഇതു! :)  ഇനി ബച്ചൻ സാർ മലയാളത്തിന്റെ മ എന്നു കേട്ടാൽ പോലും ഉലക്കയെടുക്കും, ഉറപ്പ്! :)

അല്ല, വേറോരു സംശയം : ഈ ഇന്ത്യാ മഹാരാജ്യത്തിൽ ആകെ ഒരു മേജർ മഹാദേവൻ മാത്രേ ഉള്ളോ, ഈ തീവ്രവാദികളെ മൊത്തം പിടിക്കാനും, വിമാനറാഞ്ചികളെ പിടിക്കാനും ഒക്കെ? അതും, വിമാനത്തിന്റെ ഒരു പ്ലാനും ഒന്നും ഇല്ലാതെ, മേജറും ട്രെയിനിങ്ങ് കഴിഞ്ഞ് ഇറങ്ങി വന്ന കമാണ്ടോ പിള്ളാരും കൂടെ ചുമ്മാ വിമാനത്തിന്റെ ലാന്റിങ്ങ് ഗിയർ വഴി നടന്നു കയറി കാർഗോവിൽ ഒളിച്ചിരിക്കുന്നു .. അവിടുന്നു അവരു ചുമ്മാ ഒരു ഡോർ തുറന്ന് പാസഞ്ചർ ഏരിയയി എത്തി എല്ലാ തീവ്രവാദികളെയും തല്ലിക്കൊല്ലുന്നു..ചുമ്മാ പൈലറ്റ് ഒന്നും അറിയാതെ ഇങ്ങനെ കയറി കയറി ക്കോക്ക്പിറ്റ് വരെ എത്താൻ പറ്റുമോ ഒരാൾക്ക്? സമ്മതിക്കണം, മേജർ രവിസാറിനെ!.

IMA ട്രെയിനിങ്ങിനെക്കാൾ കൂടുതൽ സമയം ട്രെയിനിങ്ങ് തീവ്രവാദികൾക്ക് - 4 കൊല്ലം!. എന്നിട്ടും നമ്മടെ മേജർ മഹാദേവന്റെ പുള്ളാർക്ക് നേരെ ഒരു വെടി പോലും വൈക്കാൻ അവർക്കാർക്കും കഴിഞ്ഞതും ഇല്ല! - ഓർക്കണം - വെറും കുറച്ച് ആഴ്ചകൾ മാത്രം ആയിരുന്നു മുംബൈ ആക്രമണ കേസിലെ കസബിനും മറ്റും കിട്ടിയ ട്രെയിനിങ്ങ്! എന്നിട്ട് ഏകദേശം 2 ദിവസങ്ങളോളം NSGയെ അവർ വട്ടം കറക്കി..

 ഉഗ്രൻ,  മേജർ രവിസാർ. :)


Friday, December 17, 2010

രക്തചരിത്ര 1 - RakthaCharithra 1 (6.5/10)


Rakht Charitra/Hindi/2010/Action-Political-Thriller/IMDB/(6.5/10)

പ്ലോട്ട് : ആന്ധ്രാപ്രദേശ്, അവിടത്തെ രാഷ്ട്രീയം ആണു സിനിമയുടെ ശരിക്കുമുള്ള ത്രെഡ്. അതിലെ തന്നെ, പരിതല(ള?) രവീന്ദ്ര (Parithala Ravindra) എന്ന ഗുണ്ടാ-രാഷ്ട്രീയ നേതാവിന്റെ ജീവിതകഥയെ ആസ്പദമാക്കി എടുത്തിരിക്കുന്ന സിനിമ ആണിതു. രാം ഗോപാൽവർമ്മയുടെ സിനിമ, ആന്ധ്രാ രാഷ്ട്രീയം, സംവിധായകന്റെ തന്നെ മുൻ‌കൂർ ജാമ്യം സിനിമയിലെ വയലൻസിനെ പറ്റിയുള്ളതു - ഇവ ഒക്കെ തന്നെ ഈ സിനിമയുടെ മെയിൻ കണ്ടന്റ് എന്തെന്നു വ്യക്തമാക്കുന്നു - വയലൻസ്! .

ഈ സിനിമ രണ്ട് ഭാഗങ്ങൾ ആയിട്ടാണു കാണികൾക്ക് മുന്നിൽ എത്തുന്നതു. ആദ്യത്തേതിൽ നായകന്റെ ഉദയവും, രണ്ടിൽ പിന്നീടത്തെ സംഭവങ്ങളും ഉൾക്കൊള്ളിച്ചിരിക്കുന്നു.  രണ്ട് ഭാഗങ്ങൾ ആയിട്ട് സ്ക്രീനിൽ എത്തുന്ന ഒരു സിനിമ ഇന്ത്യൻ സിനിമയിൽ ഇതു ആദ്യം ആണേന്നു തോന്നുന്നു (ആണോ?)  

വെർഡിക്ട് :  ടെക്നിക്കലി, കൊള്ളാം. ഓവർ ആവാത്ത സ്ലോമോഷൻ സീനുകൾ ഇടക്കിടക്ക് വരുന്നതൊക്കെ നല്ലവണ്ണം എന്നെ രസിപ്പിച്ചു. പക്ഷെ വോയ്സ് ഓവർ സീനുകൾ രസംകൊല്ലികൾ ആയെന്നു തോന്നു - അതു വളരേ കൂടിപ്പോയി - ഒരു ഹൈ ബജറ്റ് ഡോക്യുമെന്ററി ആണോ ഞാൻ കാണുന്നതു എന്നു എനിക്ക് പലപ്പോഴും തോന്നിപ്പോയി.പക്ഷെ, രാംഗോപാൽ വർമ്മയുടെ ട്രേഡ് മാർക്ക് ഷോട്ടുകൾ  - പ്രധാന സംഭവങ്ങൾ അപ്രധാന കഥാപാത്രങ്ങളുടെ കണ്ണിലൂടെ കാട്ടുന്നതു മാതിരിയുള്ള ഫ്രെയിമുകൾ - ഇതിലുമുണ്ട്.

വയലൻസ് : .. ഇച്ചി കൂടുതൽ ആണു ഇതിൽ. മനുഷ്യജഡങ്ങൾ മരത്തേൽ കെട്ടിത്തൂക്കി ഇടുന്ന സീനുകൾ ഒക്കെ ഇടക്കിടക്ക് ഉണ്ട്, കൈകാലുകൾ വെട്ടുന്നതൊക്കെ ചറപറാ.. വെറുതെയല്ല, സംവിധായകൻ ഏതോ അഭിമുഖത്തിൽ പറഞ്ഞത്, പെണ്ണുങ്ങൾ ഈ സിനിമ കാണാൻ വരേണ്ടാ, വീട്ടിൽ ഇരുന്നാൽ മതിയെന്നു!

നടനം : വില്ലൻ! എന്റമ്മോ കിടിലൻ! എന്നാ സ്ക്രീൻ പ്രസൻസാ ഈ പിശാശിന്റെ ! ലവൻ ആരെന്നു ഒരു സെർച്ച് ചേയ്തപ്പോ പുടി കിട്ടി. അഭിമന്യൂ സിങ്ങ് ആണിവൻ.  ( പഴേയ ചന്ദ്രചൂർസിങ്ങിന്റെ അനിയൻ)  ലിവൻ കലക്കും ഇനീം!. ബുക്കാ സിങ്ങ് മനസ്സിൽ നിന്നും പോവുന്നതെ ഇല്ല.  

വിവേക് ഒബ്രോയ് : ദാദാ റോളുകളിൽ വിവേകിനെ വെല്ലാൻ ആരുമില്ല എന്ന സ്ഥിതി വരികയാണെന്നാ തോന്നുന്നേ. പക്ഷെ വേറേ എന്തു റോൾ കൊടുത്താലും, നശിപ്പിച്ച് കൈയ്യിൽ വച്ചു തരും കക്ഷി!. :)  പക്ഷെ, ഒള്ളതു പറയണോല്ലോ - വില്ലന്റെ പ്രകടനം നായകന്റേതിനെക്കാൾ അസ്സലായി, ഈ സിനിമയിൽ! നായകൻ തോൽക്കണേ എന്നു വരെ എനിക്ക് തോന്നിപ്പോയി ഇടക്ക്, ലവനെ കുറച്ചും കൂടെ നേരം കണ്ടിരിക്കാനായിട്ട്.

ഒരു നായിക ഉണ്ട് : എന്റമ്മേ .. എന്നാ ഐശ്വര്യമാ ആ മുഖത്ത്!. ഐശ്വര്യാ റായ് ആദ്യ പെപ്സി ആഡിൽ വന്ന ടൈമിലെ ഒരു ലുക്ക്! .. ഗ്ലാമറിനെക്കാളധികം ഐശ്വര്യം തുളുമ്പുന്ന, ഒരു ഗ്രാമീണ മുഖം. എനിക്കിഷ്ടായി! (എന്റെ കൊച്ച് വരില്ലായിരിക്കും അല്ലേ ഇവിടെ! ;) )

വാൽക്കഷ്ണം : എനിക്കിപ്പോ പുടികിട്ടി, അമൽനീരദിൽ കൂടിയിരിക്കുന്ന സ്ലോമോഷൻ പ്രേതം എവിടുന്നു കൂടി എന്നു. രാംഗോപാൽ വർമ്മയിൽ നിന്നും തന്നെ!. പക്ഷെ വ്യത്യാസം : ഇങ്ങാരു ചേയ്യും‌മ്പോൾ നമുക്കതു രസിക്കുന്നു, അമൽ നീരദ് ചേയ്യു‌മ്പോൾ അതു ബോർ ആയിട്ട് തോന്നുന്നു. അധികമായാൽ അ‌മൃതും വിഷം എന്നതു അമൽ നീരദ് മനസ്സിലാക്കേണ്ടിയിരിക്കുന്നു!.


Tuesday, December 14, 2010

രാംഗോപാൽ വർമ്മയുടെ കണ്ടിന്യൂറ്റി !!

നല്ല സിനിമകളുടെ ആശാനായ, അധികം പ്രശ്നങ്ങൾ വരുത്തിവൈക്കാതെ പടമെടുക്കുന്ന രാം ഗോപാൽ‌വർമ്മയുടെ പുതിയ പടം കാണുന്നു ഞാൻ .. ആദ്യ സീനിൽ തന്നെ കല്ലുകടി.!! :(




അടിക്കാൻ ഇട്ട് ഓടിക്കുന്ന ഗുണ്ടയുടെ കാലേൽ നല്ല ഒന്നാംതരം ലെതർ ഷൂ ശ്രദ്ധിച്ചല്ലോ അല്ലേ?


ഇതിൽ വ്യക്തം ഷൂസ് .. ഗുണ്ടകളുടെ കാലുകളിൽ ..




ഢിം!! .. എവിടെപ്പോയി??




പ്രൊഡക്ഷൻ ടീം ലെതർ ഷൂസ് നനഞ്ഞ് പോവ്വാതിരിക്കാൻ ഊരി വാങ്ങിയോ?

ഒരാളെ ചവിട്ടുമ്പോൾ വേദനിക്കാതിരിക്കാൻ ഷൂസ് വേണ്ടാ എന്നു തീരുമാനിച്ചിരിക്കാം - എന്നാൽ പിന്നെ ആദ്യ  ഷോട്ട് ചേയ്തപ്പോൾ തന്നെ അതു തീരുമാനിക്കാമായിരുന്നില്ലേ? അല്ലേങ്കിൽ തീരുമാനം വന്നു കഴിഞ്ഞ് രണ്ടാമത് ആദ്യ ഷോട്ട് എടുക്കാമായിരുന്നില്ലേ? ... പിച്ച തെണ്ടി സിനിമ ഉണ്ടാക്കുന്ന പ്രോഡ്യൂസർ ഒന്നും അല്ലല്ലോ? സൺ ഗ്രൂപ്പിന്റെ പ്രൊഡക്ഷൻ അല്ലേ, അവർ എത്രയോ ലക്ഷം കോടി ഒരൊറ്റ എടപാടു വഴി തന്നെ ഉണ്ടാക്കി ഇരിക്കുന്ന ടീംസാണെന്നാ നാട്ടാരു പറയുന്നേ.. എന്നിട്ടാ.!

ആദ്യ ഉരുളയിൽ തന്നെ കല്ലുകടിച്ചു - ‘ആഗ്‘ പോലായിത്തീരുവോ എന്റ കൃഷ്ണാ ഇതും?


Monday, December 13, 2010

കുഞ്ഞൻ റേഡിയോ



പാടാനറിയുന്നത്, പാടാൻ പറ്റുന്നതു, അതൊക്കെ ഒരു മുൻ‌ജന്മ സുകൃതഫലമാണു. അതിനു തലമുറകൾ പലതു പുണ്യം ചേയ്യണം. അതിനെക്കാൾ ഭാഗ്യമുണ്ടാവണം, ആ പാട്ട് അവതരിപ്പിക്കാനും, അത് ലക്ഷോപലക്ഷം പേരിലേക്ക് എത്തിക്കാനും കഴിയുന്നതിൽ. പണ്ടൊക്കെ അതിനെത്ര പാടായിരുന്നു! ..  

ഇനി ഇപ്പോൾ ദാ സംഭവം സിമ്പിൾ : ചേരുക, പാടുക, ഡിം .. !   ഹോ.. എനിക്ക് ഒന്നു മൂളിപ്പാട്ടെങ്കിലും പാടാൻ പറ്റിയിരുന്നെങ്കിലെന്റേ കൃഷ്ണാ !  :(


Sunday, December 5, 2010

പോക്കിരിരാജ - PokkiriRaja (3/10)


Malayalam/2010/Action-Drama-Comedy/IMDB/(3/10)

പ്ലോട്ട് : അങ്ങനൊന്നില്ല. നായകന്മാർ രണ്ട്, നായിക ഒന്നു. ഒരു നായകൻ നാടു വിട്ട് പോവുന്നു, റൗഡി യൂണിവേഴ്സിറ്റിയിൽ പഠിക്കാൻ, മറ്റേ ആൾക്ക് തല്ല് കിട്ടുമ്പോൾ അയാളെ തിരിച്ച് വിളിക്കുന്നു.. പിന്നെ മിനുറ്റിനു മിനുറ്റിനു അടി, അതിന്റെ ബോറടീ മാറ്റാൻ ബ്രെഡിനിടയിൽ ജാമെന്ന പോലെ പാട്ടുകൾ. അവസാനം ഒരു കൂട്ടയടി. തീർന്നു.

വെർഡിക്ട് : പക്കാ ചവറ്. ഫ്രീ ആയിട്ട് ആരെങ്കിലും ഈ സിനിമയുടെ ഡി വിഡിയോ വീ സീ ഡിയോ തന്നാൽ ഉടൻ മനസ്സിൽ കുറിക്കുക - അയാൾ നിങ്ങളുടെ ഒരു ശത്രുവാണു. അയാളെ സൂക്ഷിക്കുക, ഇതിലും മുട്ടൻ പാര അയാൾ വേറേ തരാനില്ല, എങ്കിലും.

സുരാജിനെ പോലീസ് എൻ‌കൗണ്ടർ ചേയ്യാഞ്ഞതെന്തേ? ഇത്രയും കാലം സിനിമാ നടന്മാർ അഭിനയിച്ച് പോലീസിനെ കരിവാരിത്തേച്ചതൊന്നും ഒന്നുമല്ല, സുരാജിന്റെ ഈ സിനിമയിലെ കഥാപാത്രവും ആയിട്ട് തട്ടിച്ച് നോക്കുമ്പോൾ - ആരേ കണ്ടാലും - സ്വന്തം ഭാര്യേ കണ്ടാൽ പോലും - പേടിച്ച് മതിലുചാടി ഓടുന്ന പോലീസ് ആപ്പീസർ ..തമാശക്കും ഒരു അതിരില്ലേ? ഇതിന്റെ പേർ തമാശയെന്നല്ല,  വൃത്തികേട് എന്നാണു.

സലിംകുമാർ ഇടക്കിടക്ക് വന്നു പോവുന്നുണ്ട് - അങ്ങാർക്ക് പ്രമേഹമുണ്ടോ ? മെലിഞ്ഞ് വരുന്നു? (അല്ലാതെ കഥാപാത്രത്തെപറ്റി ഒന്നും പറയാനില്ല എനിക്ക്!) ശ്രേയാശരൺ ഒക്കെ എന്തിനായിരുന്നാവോ ഈ പടത്തിൽ? ടോമിച്ചൻ മുളകുപാടം എന്ന പ്രോഡ്യൂസറിന്റെ കാശ്  കുറച്ച് ആ വഹയിൽ പോയതു മിച്ചം.

സംവിധായകൻ : ആരാണീ വൈശാഖ്? ഏത് നാട്ടുകാരൻ? ഹൊ ... ഇങ്ങനേം മനുഷ്യനെ കൊല്ലാക്കൊല ചേയ്യുവോ? ധാരാളം പ്രശ്നങ്ങൾ അവിടിവിടെ അങ്ങാരുടെ വഹയായിട്ട് വന്നിട്ടുണ്ട് - ഇത്രേം കോൺസണ്ട്രേഷൻ ഇല്ലാതെ ഞാൻ ഒരു പടം കണ്ടിട്ടില്ല - എന്നിട്ടും പ്രശ്നങ്ങൾ അവിടിവിടെ കണ്ടു ഞാൻ. കുളിച്ച് ഈറനുടുത്ത് വന്ന് മന്ത്രീടെ ഭാര്യ പൈപ്പ് തുറക്കുന്നു - ശൂശൂ ... വെള്ളമില്ല - “അയ്യോ വെള്ളമില്ലേ പൈപ്പിൽ“ എന്നു അടുത്ത ചോദ്യം!.  കുളിച്ചതു പിന്നെ കക്കൂസീന്നു വെള്ളമെടുത്താണോ?  അവരുടെ അഭിനയവും അപാരം - സ്കൂൾ നാടകത്തിലെ പുള്ളാരു വരെ അതിലും ബെറ്റർ ആയിട്ടഭിനയിക്കും. വലിയ ഗുണ്ടാസെറ്റപ്പ് ഒക്കെ ആയിട്ട് എല്ലാം നിരത്താൻ വരുന്ന മമ്മൂട്ടിയുടെ കൂടെ അവസാന ക്ലൈമാക്സ് കൂട്ടപ്പൊരിച്ചിലിൽ ഈ പറയണ ഗുണ്ടകളെ ഒന്നും കാണാനില്ല - എന്തു പറ്റിയോ ആവോ അവർക്ക്? 

പൃഥ്വിരാജ്, മമ്മൂട്ടി ശ്രേയാ ശരൺ എന്നീ തെന്നിന്ത്യയിലെ ഏറ്റവും വലിയ സ്റ്റാറുകളെ തന്നെ കൈയ്യിൽ കിട്ടിയിട്ടും ഇത്രേം തല്ലിപ്പോളി സിനിമ പടച്ചിറക്കിയ വൈശാഖ് എന്ന സംവിധായകനെ ആണു പഞ്ഞിക്കിടേണ്ടത് ! മമ്മൂട്ടി ഒക്കെ പൊട്ടത്തരം പറഞ്ഞ് കൈയ്യടി(?) വാങ്ങുന്ന പരിപാടി ഒന്നു നിർത്തിയിരുന്നെങ്കിൽ!! എത്രാമത്തെ പടമായി ഇങ്ങനെ തെറ്റ് പറഞ്ഞും, മറുഭാഷ പറഞ്ഞും കൈയ്യടി വാങ്ങാൻ ശ്രമിക്കുന്നേ അങ്ങാരു!

അല്ലെങ്കിലും, ഈ സ്റ്റാറുകൾക്കൊക്കെ എന്തിന്റെ കേടായിരുന്നു? ഒരു വരി എങ്കിലും കഥ കേട്ടിട്ടാണോ ഇവർ ഒക്കെ ഡേറ്റ് കൊടുക്കുന്നതു? ആണെങ്കിൽ ഈ സിനിമ മലയാളത്തിന്റെ നാണം കെടുത്താൻ ഇറങ്ങില്ലായിരുന്നു..

വാൽക്കഷ്ണം : ഇനി കുട്ടിസ്രാങ്ക് കാണണം - എന്നാലേ ഈ സിനിമ ചേയ്ത കേട് തീരു. !  പണ്ട് സിനിമ കൊട്ടകയിൽ ഇറങ്ങിയപ്പോൾ എന്നേം വിളിച്ചോണ്ട് ഈ സിനിമ കാണാൻ കൊണ്ട് പോയ പാക്കരനെ എനിക്കൊന്നു കാണണം ... അവനോട് ഞാനെന്തു തെറ്റു ചേയ്തു എന്ന് എനിക്കിന്നറിയണം! .. അന്നു ഞങ്ങൾ ചെന്നു ഇറങ്ങിയപാടേ ഹൗസ്ഫു:ൾ ബോർഡ് തൂക്കിയ കൊട്ടകയിലെ സെക്യൂരിറ്റിക്കാരനു എനിക്ക് ഒരു മസാല ദോശ എങ്കിലും വാങ്ങിക്കൊടുക്കുകയും വേണം .. എന്റെ ജീവൻ അയാൾ രക്ഷിച്ചു അന്നു!


Saturday, December 4, 2010

Friday, December 3, 2010

M3DB : ഒരു സമ്പൂർണ്ണ മലയാളം സിനിമാ ഡാറ്റാബേസ്



അങ്ങനെ, ഞങ്ങൾ കുറച്ച് പേർ കുറച്ചധികം നാളായി കാത്തിരുന്ന, സ്വപ്നം കണ്ട ഒരു സംരംഭം - ഒരു സംഭവം - വെളിച്ചം കാണുകയാണു . എം 3 ഡി ബി (M3DB) അഥവാ, ‘മലയാളം മൂവി ആൻഡ് മ്യൂസിക്ക് ഡാറ്റാബേസ്’ ഈ വരുന്ന 2010 ഡിസംബർ 20 നു പാലക്കാട് വച്ച് ലോഞ്ച് ചേയ്യപ്പെടുകയാണു ഒരു ചെറു ചടങ്ങിൽ ..

ഇതൊരു IMDB അല്ലായെങ്കിൽ വിക്കിപ്പീഡിയ മോഡൽ ഡാറ്റാബേസ് ആയിരിക്കും. നമ്മൾ ഉൾപ്പെടുന്ന പൊതുജനം ആവും ഇതിലെ സ്റ്റാർസ്. നമ്മൾ ആവും സിനിമകളുടെ ഡാറ്റാ എന്റർ ചേയ്യുന്നതു, നമ്മളിൽ നിന്നും തിരഞ്ഞെടുത്ത ആക്ടീവ് മെംബേഴ്സിനാൽ ആവും എന്റർ ചേയ്യപ്പെടുന്ന ഡാറ്റ മോഡറേറ്റ് ചേയ്യപ്പെടുന്നതു, സൈറ്റിന്റെ കാര്യങ്ങൾ നിശ്ചയിക്കപ്പെടുന്നതു നമ്മളിൽ നിന്നും തിരഞ്ഞെടുക്കപ്പെട്ട ഒരു മോണിറ്ററിങ്ങ് ടീം ആയിരിക്കും. അങ്ങനെ അധികാരം ജനങ്ങളിലേക്ക് എന്ന ഇതു വരെ പാലിക്കപ്പെടാത്ത ആ വാഗ്ദാനം ഇവിടെ ഈ സൈറ്റിൽ എങ്കിലും പ്രാവർത്തികമാക്കപ്പെടുന്നു. :)

യാതോരു സ്റ്റാറിന്റേയും സൈഡ് പിടീക്കാതെ, ഒരു സിനിമക്കും അനാവശ്യ പ്രമോഷൻ കൊടുക്കാതെ തികച്ചും സുതാര്യമായിട്ടാവും സൈറ്റ് മുന്നോട്ട് നീങ്ങുക. ജനങ്ങൾക്ക് സിനിമകളെ പറ്റി അഭിപ്രായങ്ങൾ പോസ്റ്റ് ചേയ്യാൻ പറ്റുന്ന തരം സംവിധാനം വർഷങ്ങൾക്ക് ശേഷം, പിന്നീട് സൈറ്റിൽ വന്നേക്കാം, പക്ഷെ ഇപ്പോൾ നമ്മുടെ ദൗത്യം മലയാള സിനിമയെ പറ്റി, അതിന്റെ പിന്നാമ്പുറ പ്രവർത്തകരെ പറ്റിയുള്ള ഒരു റഫറൻസ് മാന്വൽ ആയി സൈറ്റിനെ മാറ്റുക എന്നതാണു.

ഇതു നമ്മുടെ, മലയാള സിനിമയെ ഇഷ്ടപ്പെടുന്നവരുടെ ഒരു പ്രൊജക്ട് ആണു. ഒരു സിനിമയിൽ അവസാന ക്രെഡിറ്റ്സിൽ പോലും സ്ഥലം കണ്ടെത്താനാവാതെ വിഷമിക്കുന്ന സിനിമയുടെ പിന്നാമ്പുറ പ്രവർത്തകരെ ജനങ്ങൾക്ക് പരിചയപ്പെടുത്തുക എന്നതും ഈ സൈറ്റിന്റെ പ്രഖ്യാപിത ലക്ഷ്യങ്ങളിൽ ഒന്നാണു.  ഇംഗ്ലീഷ് സിനിമകളിലെ ഏതൊരു കൊച്ച് ടെക്നീഷ്യന്റേയും ഹിസ്റ്ററി, പ്രൊഫൈൽ പേജുകൾ, വർക്കുകൾ- അതെത്ര ചെറുതാണെങ്കിലും ശരി, ഇതൊക്കെ ഐ എം ഡി ബി യിൽ ട്രാക്ക് ചേയ്യാം, ഇവിടെ മലയാളത്തിൽ അങ്ങനെ ഒന്നുണ്ടോ എന്ന ചോദ്യത്തിനുള്ള ഉത്തരമാവാൻ ആണു നമ്മൾ ശ്രമിക്കേണ്ടതു.

ഇതിനെല്ലാം, നിങ്ങളുടെ സപ്പോർട്ടും സഹായവും സൈറ്റിനു ആവശ്യമാണു. സഹായം എന്നു കൊണ്ടുദ്ദ്യേശിച്ചതു പണമല്ലാട്ടോ - കൈ സഹായം ആണു. കിട്ടുന്ന ഡാറ്റ സൈറ്റിൽ ആഡ് ചേയ്തു സഹായിച്ചാൽ ചിലപ്പോൾ അതു മറ്റു പലർക്കും സഹായകരമായി തീർന്നേക്കാം. ഇതു ഭാവി തലമുറക്കു ഉപകരിക്കുന്ന ഒരു ഡാറ്റാ കളക്ഷൻ ആവട്ടെ എന്നു സ്വപ്നം കണ്ടുകൊണ്ട് നിർത്തുന്നു .. നിങ്ങളുടെ എല്ലാവരുടേയും സഹായം പ്രതീക്ഷിക്കുന്നു ..

പാച്ചു.


ഒരറിയിപ്പ് : ഈദിവസങ്ങളിൽ ഈ സൈറ്റിന്റെ പോസ്റ്റേഴ്സ് ഒരു ചെറു പരസ്യം എന്ന നിലയിൽ ഇവിടെ പോസ്റ്റുന്നതാണു - ഇങ്ങനെയൊക്കെയല്ലേ ഇതിനു പിന്നിൽ  ലാഭേച്ഛയില്ലാതെ പ്രവർത്തിക്കുന്ന ആ മനസ്സുകൾക്ക് ഒരു പ്രചോദനം കൊടുക്കാൻ ആവൂ നമുക്ക്?  ഇതു നിങ്ങളുടെ ഇൻബോക്സ് നിറക്കുന്നുണ്ടെങ്കിൽ ഇതൊരു മുൻ‌‌കൂർ ജാമ്യാപേക്ഷയായി കണക്കാക്കണം എന്നു അപേക്ഷിക്കുന്നു. :)


Tuesday, November 30, 2010

കോക്ക്ടെയിൽ ഒറിജിനൽ - Butterfly on a wheel (7.5/10)

Butterfly on a Wheel (US: Shattered, Europe: Desperate Hours)
English/2007/Action-Thriller/IMDB/(7.5/10)
Rated R for some language and violence 

പ്ലോട്ട് : കോക്ക്ടെയിൽ എന്ന മലയാളം സിനിമയുടെ അതേ പ്ലോട്ട് - ഈ സായിപ്പന്മാർ എങ്ങനെ നമ്മൾ റിലീസ് ചേയ്യുന്നതിനു മൂന്നു വർഷം മുന്നേ തന്നെ നമ്മുടെ സിനിമകളുടെ കഥയും, കഥാപാത്രങ്ങളും എന്തിനു സീനുകളും വരെ അടിച്ച് മാറ്റി സിനിമ ഉണ്ടാക്കുന്നു? സി ഐ എ യുടെ കറുത്ത കരങ്ങൾ ഇതിനു പിന്നിലും ഉണ്ടോ എന്നു എനിക്ക് ബലമായ സംശയമുണ്ട് ..!

ഒന്നൂടെ പറയാം പ്ലോട്ട് : ഒരു കുടുംബസ്നേഹമുള്ള, സത്ഗുണ സമ്പന്നനായ, കരിയറിൽ ഉയർച്ചകൾ മാത്രം നേടിക്കൊണ്ടിരിക്കുന്ന നായകൻ, സത്ഗുണസമ്പന്നയായ നായിക, ഒരു കുട്ടി. അവരുടെ ജീവിതത്തിലേക്ക് - ആക്ച്വലീ, കാറിലേക്ക് ഒരു അപരിചിതൻ ഒരു തോക്കുമായി കയറി വരുന്നതും, അയാൾ അവരുടെ ജീവിതത്തെ തന്നെ മാറ്റി മറിക്കുന്നതും ആണു കഥ.


വെർഡിക്ട് : അപരിചിതനായിട്ട് പിയേഴ്സ് ബ്രോൻസ്നൻ കലക്കീട്ടുണ്ട്. ജറാഡ് ബട്ട്ലർ തകർപ്പനാക്കി! :)   സിനിമ കണ്ടിരിക്കാൻ പറ്റിയ ഒരു നല്ല പടം തന്നെയാണു. ഒരുഗ്രൻ പ്ലോട്ടും, അതിൽ നിന്നും അതിനെക്കാൾ ഉഗ്രൻ ഒരു സിനിമയും ഉണ്ടാക്കിയ സിനിമയുടെ പിന്നാമ്പുറ പ്രവർത്തകർക്കാണു മുഴുവൻ മാർക്ക്സും.

അതിനു കൂടെ നമ്മുടെ കോക്ക്ടെയിൽ എന്ന പടത്തിനും ഒരു കൈയ്യടി ഇവിടെ കൊടുക്കേണ്ടതാണു. ഈ സായ്‌വിന്റെ സിനിമക്കൊപ്പം തന്നെ നിൽക്കാവുന്ന തരത്തിലുള്ള ഒരു സിനിമ ആണു നമ്മൾ മലയാളികൾ ഉണ്ടാക്കിയതു എന്നതിൽ അഭിമാനിക്കാം നമുക്ക്. കോക്ക്ടെയിലിന്റെ ചില കാമറാ ആംഗിൾസൊക്കെ ഇപ്പോഴും എന്റെ മനസ്സിൽ മായാതെ നിൽക്കുന്നു - ഈ കഴിവ് ഒരു ഒറിജിനൽ സൃഷ്ടിക്കായി ചിലവഴിച്ചിരുന്നെങ്കിൽ എന്തായിരുന്നു, അവർക്ക്! :(

വാൽക്കഷ്ണം : കോക്ക്ടെയിൽ കണ്ടിട്ടുള്ളവർ ഈ സിനിമ കാണണമെന്നില്ല - കാരണം സിനിമ ഫ്രെയിം ബൈ ഫ്രെയിം കോപ്പി അടിച്ച് വച്ചിരിക്കുകയാണു ഈ സായിപ്പന്മാർ!.. ഇങ്ങനേം ഉണ്ടോ കോപ്പിയടി! അവസാന ക്ലൈമാക്സ് ഡയലോഗുകൾ ഒക്കെ, തനി ഈച്ചകോപ്പി!.

പക്ഷെ, ഒന്നുണ്ട്, കോക്ക്ടെയിൽ ടീം വരുത്തിയ മണ്ടത്തരം സായിപ്പന്മാർ ചേയ്തിട്ടില്ല - ചുമ്മാ സിനിമ ഒരു രണ്ടാം ക്ലൈമാക്സിലേക്ക് വലിച്ച് നീട്ടി അതു വരെ ഉണ്ടാക്കിയ ആ നല്ല ഫീൽ അവർ കളഞ്ഞ് കുളിച്ചില്ല - ഒറിജിനൽ നിർമ്മിച്ച മലയാള സിനിമാക്കാർക്ക് അതു ഒന്നു കണ്ടു പഠിക്കാം അടുത്ത പടം പ്ലാൻ ചേയ്യുമ്പോൾ.


Monday, November 29, 2010

ബോസ് എംഗിരാ ഭാസ്കരൻ (Boss engiraa Bhaskaran) (7.5/10)

Tamil/2010/Romantic-Comedy/IMDB/(7.5/10)

പ്ലോട്ട് : നാ‍യകൻ ഒരു പണീം ചേയ്യാതെ ഒള്ള അലമ്പോക്കെ ചേയ്തു നടക്കുന്ന ഒരുത്തൻ - ഭാസ്കരൻ അഥവാ ബോസ് ആയിട്ട് ആര്യ. നായിക : നായകന്റെ ചേട്ടന്റെ ഭാര്യയുടെ അനുജത്തി. തമ്മിൽ പ്രേമം - നായിക നല്ല വിദ്യാഭ്യാസം, നായകൻ പന്ത്രണ്ടാം ക്ലാസ്സും ഗുസ്തിയും - ജീവിതാഭിലാഷം ഡിഗ്രി പാസ്സാവുക എന്നതും ആണു. കൈ വൈക്കുന്നതൊക്കെ പാര ആയി മാറുക എന്ന അസാധാരണമായ രോഗവും കൂടെ ഉള്ള നമ്മുടെ നായകന്റെ നായികക്കു വേണ്ടിയുള്ള ഫൈറ്റ് ആണു സിനിമക്ക് ആധാരം.

വെർഡിക്ട് : കലക്കൻ! :) നടന്മാർ, നടിമാർ, ഡയറക്ടർ, സംഭാഷണങ്ങൾ, സിനിമാറ്റോഗ്രാഫി, കോറിയോഗ്രാഫി .. മൊത്തം കലക്കി കടുകുവറുത്തു! :) എന്റെ അഭിപ്രായത്തിൽ ഇതൊരു പക്കാ ടൈം‌പാസ് ഫിലിം ആണു, എങ്കിലും, എന്തെങ്കിലും ഒരു നല്ല ഫീലിങ്ങ് നമ്മളിൽ ബാക്കി വച്ചിട്ടാണു സിനിമ തീരുന്നതു. പല അവസരങ്ങളിലും ഞാൻ ഡി വി ഡി പോസ് ചേയ്തു ചിരിച്ച് തീർത്തിട്ടാണു കാണൽ കണ്ടിന്യൂ ചേയ്തത്. നല്ല ഹാസ്യം അവിടിവിടെ നല്ലവണ്ണം - എന്നാൽ ഓവറാവാതെ  -ചേർത്തിറക്കിയിരിക്കുന്ന ഒരു റൊമാന്റിക്ക് ഫിലിം. :) ..  

ഡയലോഗുകൾക്കിടയിലെ പഴയ സിനിമകളെ പറ്റിയുള്ള പരാമർശങ്ങൾ, ആ സിനിമകളിലെ ബാക്ക്ഗ്രൗണ്ട് സ്കോറുകൾ എന്നിവ ഒക്കെ സ്മാർട്ടായിട്ട് ഉപയോഗിച്ച് സിനിമയെ ഒരു കിടീലൻ എന്റർടൈനർ ആക്കാൻ സാധിച്ച രാജേഷ് എന്ന സംവിധായകനു ഫുൾ മാർക്ക്സ്!

 എന്റെ അഭിപ്രായത്തിൽ ഒരു മസ്റ്റ് സീ ഫിലിം ആണിതു. :)

വാൽക്കഷ്ണം :  ഡയറക്ടർ ഡയറക്ട് ആയിട്ട് കഥാപാത്രത്തെ ഫോൺ വിളിച്ച് “മര്യാദക്ക് ചേയ്യാൻ വന്ന കാര്യം ചേയ്തിട്ട് പോകിനടൈ” എന്നു പറയുന്ന ഒരു സീൻ ഉണ്ട് സിനിമയിൽ - തമാശക്കാണെങ്കിലും, എനിക്കാ പരിപാടി ശരിക്കങ്ങ് ബോധിച്ച് :)


Sunday, November 28, 2010

മാചൈറ്റൈ - Machette (5.5/10)



English/2010/Crime-Action/IMDB/(5.5/10)
Rated R for strong bloody violence throughout, language, some sexual content and nudity.

മുൻ‌കൂർ ജാമ്യം : മാഷൈറ്റെ, മാചൈറ്റൈ, മാഷൈറ്റി .. ഇതിൽ ശരിക്കും പേരു എന്താണെന്ന് ചോദിച്ചാൽ .. ഞാനീ നാട്ടുകാരനല്ല എന്നു പറയുകയെ നിവൃത്തിയൊള്ളൂ - സിനിമക്കകത്ത് പോലും പലയിടത്തും പല രീതിയിൽ പറയുന്നുണ്ട് ഈ പേരു.. സോ, ഐ ആം നോട്ട് ദിസ് പ്ലേസ്-മാൻ!!

പ്ലോട്ട് : മെക്സിക്കോവിൽ നിന്നും നുഴഞ്ഞ് കയറി അമേരിക്കയിൽ എത്തിയിരിക്കുന്ന ഒരു ഫെഡറൾ ആപ്പീസർ - മാചൈറ്റൈ - നാർക്കോട്ടിക്ക്സ് വാറിൽ മുഖ്യ പങ്ക് വഹിച്ചതിനു പകരം സ്വന്തമായതെന്തും നഷ്ടപ്പെട്ട അയാൾ അമേരിക്കയിൽ എത്തിയിരിക്കുന്നതു പ്രതികാരത്തിനായി മാത്രമാണു .. ആ പ്രതികാരം ആണു പ്ലോട്ട്.

വെർഡിക്ട് : IMDB, Rotten Tomatoes, മറ്റു റിവ്യൂസ്, എന്നിവകളിൽ ഒക്കെ ‘കിടു’ എന്ന പേരു  ഈ സിനിമയുടെ പര്യായമായി തന്നെ പറയുന്നുണ്ട് - ചിലപ്പോൾ ‘എൽ മരിയാച്ചി‘,  ‘ഡെസ്പരാഡോ’ .. തുടങ്ങിയ സിനിമകൾ ഉണ്ടാക്കിയ റോഡ്രിഗ്ഗസ്സ് ഉണ്ടാക്കുന്നതെന്തും ഉഗ്രൻ എന്നു പറഞ്ഞില്ലാ എങ്കിൽ പോലീസ് പിടീക്കും എന്ന ധാരണ ഉള്ളതു കൊണ്ടാവുമോ എന്നറിയില്ല,  പക്ഷെ എങ്കിൽ, എന്റെ വിവരക്കേട് കൊണ്ടോ, സിനിമ എങ്ങനെ ആവണം എന്നുള്ള മുൻ‌ധാരണകൾ കൊണ്ടോ മറ്റോ, ഈ സിനിമ എനിക്കത്ര ദഹിച്ചില്ല. കൊറേ വെടി, കൊറേ വെട്ട്, കോറേ കുത്ത്, കൊറേ സ്ഫോടനങ്ങൾ, കൊറേ ജമണ്ടൻ സ്റ്റാർസ്, കൊറേ നഗ്നമേനികൾ - ലിൻസേ ലോഹന്റെ ഉൾപ്പെടേ -, .. പിന്നെ ഓരോ മിനുറ്റിലും കൊലപാതകങ്ങൾ - വിത്ത് ലോട്ട്സ് ആൻഡ് ലോട്ട്സ് ഓഫ് ബ്ലഡ്.! തീർന്നു സിനിമ. 

ഈ കഥയില്ലായ്മയും, കേട്ട് കേട്ട് മത്തുപിടിച്ച തീമും, പ്രത്യേകിച്ച് പ്രത്യേകതകൾ ഒന്നുമില്ലാത്ത സ്റ്റോറി ടെല്ലിങ്ങും എല്ലാം കൂടി എന്നെ ടെക്ക്നിക്കൽ കാര്യങ്ങൾ ശ്രദ്ധിക്കാൻ സമ്മതിച്ചില്ല, സത്യം. പ്രതീക്ഷ കൂടിയതു കൊണ്ടാണോ ആവോ എനിക്ക് സിനിമ പിടീക്കാഞ്ഞതു? .. അതോ ശരിക്കും എനിക്കെന്തിങ്കിലും കുഴപ്പമുണ്ടോ? !! ... ഇനി മാചൈറ്റൈ ഫാൻസ് എന്നെ ഘരാവോ ചേയ്യുവോ ആവോ .. അങ്ങനെയെങ്കിൽ എന്റെ റേറ്റിങ്ങ് 6 ആക്കിയതായിട്ട് മുൻ‌കാല പ്രബല്യത്തോടെ ഞാൻ ഇതാ ഇവിടെ പ്രഖ്യാപിക്കുകയാണു ..

വാൽക്കഷ്ണം : ലിൻസേ ലോഹന്റെ പീസ് ഉണ്ടതിൽ ;) - ആ വകുപ്പിൽ സിനിമ മിസ്സ് ആക്കാൻ പാടില്ലാത്തതാണു. പിന്നെ വെടി വൈപ്പും വെട്ടും കുത്തും ഒക്കെക്കൂടി ഒരു ബി ക്ലാസ്സ് ഫിലിം കാണുന്ന രീതിയിൽ കണ്ടാൽ കണ്ടിരിക്കാം, ബോറടിക്കില്ല. സ്റ്റീഫൻ സൈഗളിനു അനങ്ങാൻ പറ്റാത്തത്രേം തടിയും പ്രായവും ആയിരിക്കുന്നു .. മഹാ ബോറ്. ഡാനി ട്രെജോ കലക്കിട്ടുണ്ട്. :)

കാണു. കണ്ടഭിപ്രായം പറയൂ.. :)


Thursday, November 18, 2010

ദി എംഗേജ്മെന്റ് - The Engagement (10/10)



The Engagement/2010 November 14/Family-Drama/(10/10)

പ്ലോട്ട് :  'ദി ലൈഫ്' എന്ന സിനിമാ-സീരീസിലെ ആദ്യ സിനിമയാണു, 'ദി എംഗേജ്മെന്റ്'. ഈ നവംബർ മാസത്തിലെ രണ്ടാം ഞായറാഴ്ച ഈ വർഷത്തെ തന്നെ ഏറ്റവും മികച്ച ഞായറാഴ്ചയായിട്ട് എനിക്ക് തോന്നാൻ കാരണം ഈ  ഈ ആദ്യഭാഗത്തിന്റെ റിലീസിങ്ങ് തന്നെ ആണു. വളരേ നാളായി ഈ സിനിമാ സീരീസിനെപറ്റി പിന്നാമ്പുറപ്രവർത്തകർക്കിടയിൽ പോലും ഉണ്ടായിരുന്ന സസ്പെൻസിനും സംശയങ്ങൾക്കും ചിത്രത്തിന്റെ സംവിധായകർ അവധി നൽകുകയാണു, ഈ ആദ്യ ഭാഗത്തിന്റെ റിലീസിങ്ങിലൂടെ. കാണികളെ  നായികാ-നായക വിവാഹത്തിന്റെ എംഗേജ്മെന്റിൽ എത്തിച്ച്, അടുത്ത ഭാഗത്തിനായുള്ള പ്രതീക്ഷ ബാക്കി വച്ച് നിർത്തിയിരിക്കുന്നു, ഇരട്ട സംവിധായകർ. 


വെർഡിക്ട് : പടക്കം!
തുടക്കം തന്നെ ഇങ്ങനെ ആണെങ്കിൽ ബാക്കി ഭാഗങ്ങൾ എങ്ങനിരിക്കും ? ആദ്യ ഭാഗത്തിന്റെ ആഫ്റ്റർ എഫക്ട്സ് ഇപ്പോഴും എന്നെ രോമാഞ്ചപുളകിതനാക്കുന്നു.. ഈ ആഫ്റ്റർ എഫക്ട്സ് അടുത്ത ഭാഗം വരുന്നതു വരെ തുടരുക തന്നെ ചേയ്യും, ഞാൻ എന്തു ചേയ്താലും അതിൽ നിന്നും രക്ഷപെടാനാവില്ലാ എന്നെനിക്ക് തോന്നുന്നു .. !

ഈ സിനിമയിലെ ഡ്രാമയും, കോമഡിയും, സെന്റിമെന്റ്സും ക്ലൈമാക്സും ഒക്കെ തന്നെ ഇനിയും വരാനിരിക്കുന്നതേ ഉള്ളൂ എന്നതിനാൽ, തുടക്കം നൽകുന്ന പ്രതീക്ഷ കുറച്ചോന്നും അല്ല. ഏതോരു സിനിമയുടെ തുടക്കവും, വളരേ പ്രധാനപ്പെട്ടതാണു, പിന്നീടുള്ള സിനിമക്ക് ഉള്ള അടിത്തറ പാകുന്ന ചെറുതല്ലാത്ത കാര്യം ആണു ഒരു മികച്ച തുടക്കം ഓരോ സിനിമക്കും കൊടുക്കുന്നതു. . ആ അടിപ്പൻ തുടക്കം ആണു ഈ സിനിമ.  തുടക്കം തന്നെ ഇങ്ങനെ ഉഗ്രൻ ആക്കിയതിന്റെ മുഴുവൻ ക്രെഡിറ്റും നായികാ കഥാപാത്രത്തിനാണെന്നു  പറയേണ്ടിയിരിക്കുന്നു. പുതുമുഖങ്ങൾ നായികാ നായകരായി വരുന്ന ഈ ചിത്രത്തിൽ പാച്ചുവും അഞ്ജുവും മുഖ്യ വേഷങ്ങളിൽ അവതരിക്കുന്നു..

വളരേ സൂക്ഷിച്ചില്ലായെങ്കിൽ  ഡ്രൈ ആകുമായിരുന്ന സിനിമയുടെ ആദ്യ ഭാഗം സുഖമുള്ള ഒരു സ്വപ്ന ലോകത്തേക്ക് ഉയർത്തുന്ന തരത്തിലുള്ള പ്രകടനം ഒരു തുടക്കക്കാരിയുടെ വിറവലില്ലാതെ സ്ക്രീനിൽ ഫലിപ്പിക്കാൻ കഴിഞ്ഞ നായികയായ അഞ്ജുവിന്റെ പക്വമായ ഇടപെടൽ ഭാവി ഭാഗങ്ങളിലേക്കുള്ള എന്റെ പ്രതീക്ഷകൾ വർദ്ധിപ്പികുന്നു. പക്ഷെ എന്നെപ്പോലെ സംവിധായകർക്കും മറ്റു പിന്നാമ്പുറപ്രവർത്തകർക്കും, കാണികൾക്കും തന്നെ അഞ്ജുവിലുള്ള ആ അളവറ്റ പ്രതീക്ഷയുടെ ഭാരം ആ കുട്ടിയെ ദുർബലയാക്കാതിരിക്കാൻ അവൾ ശ്രദ്ധിക്കേണ്ടിയിരിക്കുന്നു, വളരേയധികം.

വാൽക്കഷ്ണം : ഒരു പാട്ട് പോലുമില്ലാത്ത റൊമാന്റിക്ക് മൂവി - ഫന്റാസ്റ്റിക്ക് സ്വപ്ന-ഷോട്ടുകൾ വഴി  സ്വപ്നഭാഗങ്ങൾ അതി മനോഹരമെങ്കിലും, ഒന്നോ രണ്ടോ പാട്ടുകൾ കൂടെ ഉണ്ടായിരുന്നെങ്കിൽ ഈ സിനിമയെ അവ അതിന്റെ മൂഡിലേക്ക് ഈസിയായി കൊണ്ടു വന്നേനേ എന്നു തോന്നുന്നു - പക്ഷെ പാടാനറിയില്ലാത്ത തിലകന്റെ ശബ്ദമുള്ള നായകൻ യേശുദാസിന്റെ പിന്നണി ശബ്ദത്തിൽ പാട്ടുപാടി അഭിനയിക്കുന്നതു ആലോചിക്കാനേ പറ്റില്ല എന്നുള്ളതും വാസ്തവം. - പക്ഷെ ഉള്ളതു പറയണമല്ലോ, പാട്ടില്ലാത്തതു ഒരു കുറവ് തന്നെയാണു!

ജനുവരി 30 നു ആണു അടൂത്ത ഭാഗമായ ‘ദി വെഡ്ഡിങ്ങ്’ റിലീസ് പ്ലാൻ ചേയ്തിരിക്കുന്നതു - സിനിമയുറ്റെ പിന്നാമ്പുറ പ്രവർത്തകർ ഈ രണ്ടാം ഭാഗം ഒരു സംഭവം തന്നെ ആക്കാനുള്ള ശ്രമം ഈ പോസ്റ്റിടുമ്പോഴേ തുടങ്ങിക്കഴിഞ്ഞിരിക്കുന്നു ...  മടി കാണിക്കാതെ നിങ്ങൾ എല്ലാവരും ആദ്യ ഷോ തന്നെ കണ്ട് ഈ നല്ല സിനിമാ സീരീസിനു എല്ലാവിധ പിന്തുണയും നൽകണം എന്നാണു എന്റെ ആഗ്രഹം. :)

(സംശയാലുക്കൾക്കായി ഒരു വാക്ക് : ഇതു ഇപ്പോൾ ഏപ്രിൽ മാ‍സമല്ല, അതു കൊണ്ട് ഇതിൽ ഒരു ഏപ്രിൽ ഫൂളിന്റെ  ചാൻസേ ഉദിക്കുന്നില്ല )  ;)


Monday, November 8, 2010

കോക്ക്ടെയിൽ - Cocktail (6.5/10)


Cocktail/Malayalam/2010/Suspense-Thriller/Wiki/(6.5/10)

പ്ലോട്ട് : സന്തുഷ്ടമായ ഒരു ഭാര്യ (സംവൃതാ സുനിൽ) -ഭർത്താവ് (അനൂപ് മേനോൻ)-കുട്ടി എന്നിവർ അടങ്ങുന്ന കുടുംബം. ഗ്രഹനാഥൻ ഒരു കൺസ്ട്രക്ഷൻ കമ്പനിയിലെ ടോപ്പ് എക്സിക്യൂട്ടീവ്. അവർ ഒരു ദിനം കാറിൽ  പോവുമ്പോൾ വഴിയിൽ നിന്നും ഒരപരിചിതനു(ജയസൂര്യ) ലിഫ്റ്റ് കൊടുക്കുന്നതും, അയാൾ അവരുടെ ജീവിതം മൊത്തത്തിൽ മാറ്റി മറിക്കുന്നതും ആയ സംഭവവികാ‍സങ്ങൾ ആണു ഈ സിനിമ. ഇനിയും കൂടുതൽ പറഞ്ഞാൽ സ്പോയ്ലറുകൾ വരാൻ സാധ്യതയുള്ളതിനാൽ പ്ലോട്ട് ചുരുക്കുന്നു.

വെർഡിക്ട് : നല്ലോരു സ്റ്റോറി ലൈൻ - പക്ഷെ ഇംഗ്ലീഷിൽ നിന്നും മോട്ടിച്ച് മാറ്റിയതു. നല്ല ഉഗ്രൻ ഡയലോഗുകൾ - അനൂപ് മേനോന്റെ. നല്ല അഭിനയം മൂന്നു പേരുടേയും (അവസാനം കൊണ്ടേ ജയസൂര്യയും മറ്റു രണ്ടു പേരും ബോറാക്കിയതു സൗകര്യ പൂർവ്വം മറന്നാൽ),

അത്യുഗ്രൻ സിനിമാറ്റോഗ്രാഫി - ക്യാമറ ശരിക്കും ഒരു ഫ്രഷ്നെസ്സ് അനുഭവപ്പെട്ടു എനിക്ക്.  ഒരിടത്ത് മാത്രമേ (കഥാപാത്രങ്ങളെ തെരുവിലൂടെ സ്റ്റെഡികാമിൽ ഫോളോ ചേയ്യുന്ന ഒരു സീൻ) ഓവറായി എന്നു എനിക്ക് തോന്നിയൊള്ളൂ..

സംഭാഷണം : അനൂപ് മേനോനു മുഴുവൻ മാർക്കും കൊടൂത്തേ തീരൂ. സ്വാഭാവികമായ ഡയലോഗുകൾ കൊണ്ട് സമ്പുഷ്ടമാണു സിനിമയുടെ ആദ്യാവസാനം. (വീണ്ടും : അവസാന 10 മിനുറ്റ് മറക്കുകയാണെങ്കിൽ) യാതോരു നാടകീയതയും ഇല്ലാതെ, യാതോരു ഏച്ചു കെട്ടലും ഇല്ലതെ വരുന്ന ഡയലോഗുകൾ നമ്മളെ ഒരു സിനിമ കാണുകയാണെന്നുള്ള വസ്തുത മറക്കാൻ പ്രേരിപ്പിക്കുന്നു - നമ്മൾ സാധാരണ വീട്ടിലും പുറത്തും പറയുന്ന സംഭാഷണങ്ങൾ പോലെയുള്ളവ മൊത്തം!. അതിനു പത്തിൽ പത്ത്!

അവസാന പത്ത് മിനുറ്റ് : എന്തിനായിരുന്നു അതു? എന്തിനു ക്ലൈമാക്സ് ഒന്നു നല്ലതു ഒത്ത് വന്നിട്ട് വീണ്ടും സംവിധായകൻ വലിച്ച് നീട്ടി? എന്തിനു അങ്ങനെ ഒരു ബോറൻ എൻഡിങ്ങിൽ പടം കൊണ്ടേ തീർത്തു? എനിക്ക് തീരേ മനസ്സിലായില്ല! ആ സമയത്ത് സിനിമയിലെ എല്ലാർക്കും വട്ടായോ? എന്ത് ഓവർ അഭിനയം ആയിരുന്നു എല്ലാറ്റിനും ആ സമയത്ത് !!!

പാട്ടുകൾ : പാട്ടുകൾ കൊള്ളാമായിരിക്കും - പക്ഷെ ഈ സിനിമയിൽ അതു രസം കൊല്ലികൾ ആയി. ഒരു പാട്ട് ദമ്പതികൾ തമ്മിലുള്ള സ്നേഹബന്ധം കാട്ടുവാനും, മറ്റോന്നു തെരുവിലെ ഒരു ക്യാബറേയും ആണു.  രണ്ടാമത്തെ ആവശ്യമേ ഇല്ലായിരുന്നു - ആദ്യത്തേത് - അതും ആവശ്യമില്ലായിരുന്നു. കാരണം സംവിധായകൻ ആ പോയിന്റ് ഓൾ‌റെഡി പാട്ടില്ലാതെ തന്നെ സ്റ്റേറ്റ് ചേയ്തു കഴിഞ്ഞതായിരുന്നു. പാട്ടുകൾ സിനിമയുടെ ആ മുറുക്കത്തെ നന്നായി ബാധിച്ചു.  വേണ്ടായിരുന്നു!

പരസ്യം : നല്ല പോസ്റ്റേഴ്സ് ആയിരുന്നു പടത്തിന്റേതായിട്ട് ഇറങ്ങിയതു.  ജയസൂര്യ അവതരിപ്പിക്കുന്ന കഥാപാത്രത്തെ പ്രൊജക്ട് ചേയ്തു കൊണ്ട് ഇറക്കിയ സിനിമയുടെ പോസ്റ്ററുകൾ സിനിമയിൽ ഉള്ള ദുരൂഹതയുടെ സാന്നിധ്യത്തെ പരസ്യം ചേയ്തു കൊണ്ട് അതിന്റെ ലക്ഷം കൈവരിച്ചു നല്ലവണ്ണം!  പോസ്റ്റേഴ്സിനും 8/10 മാർക്ക്സ്!.

ഈ രണ്ട് കാര്യങ്ങൾ ഒഴിച്ച് നിർത്തിയാൽ, ഒരു ഉഗ്രൻ ശ്രമം ആയിരുന്നു ഇതു. ഈ സംവിധായകനിൽ, അതിനെക്കാൾ അധികമായി അനൂപ് മേനോനിലെ സംഭാഷണ ടാലന്റിൽ എനിക്ക് വളരേ അധികം പ്രതീക്ഷയുണ്ട്..

മൊത്തത്തിൽ സിനിമ അബൗവ് ആവറേജ് തന്നെ.



വാൽക്കഷ്ണം : മട്ടാഞ്ചേരിയിൽ ഡെയിലി ക്യാബറേ നടക്കുന്ന തെരുവേതെന്നു ആരെങ്കിലും ഒന്നു പറഞ്ഞു തര്വോ? ഒരൂസ്സം അത് വഴി ഒന്നു കറങ്ങാനാ .. ആ കൊച്ചും കൊള്ളാം .. ;)


Friday, November 5, 2010

മാതൃഭൂമി - എ നേഷൻ വിത്തൗട്ട് വുമെൺ - Matrubhoomi-A Nation Without Women (7.5/10)



Matrubhoomi-A Nation Without Women/Bhojpuri/2003/Fiction-Drama/IMDB/(7.5/10)


പ്ലോട്ട് : സിനിമ തുടങ്ങുന്നതു തന്നെ ഒരു ഫ്ലാഷ് ബാക്കിൽ നിന്നും ആണ് - വടക്കേ ഇന്ത്യയിലെ ഒരു കുഗ്രാമത്തിലെ ഒരു പ്രസവത്തോടെ ആണു. ജനിക്കുന്നതു പെൺകുഞ്ഞ് - കുട്ടിയുടെ അച്ഛൻ കുട്ടിയെ എടുത്തു കൊണ്ടു പോയി ഒരു മതാചാരം കണക്ക് പാലിൽ മുക്കി കൊല്ലുന്നു ..

ഒരു ഫിക്ഷൻ സിനിമ ആണു മാതൃഭൂമി .. .  വടക്കേ ഇന്ത്യയിലെ ഒരു ഗ്രാമം ആണു കഥ നടക്കുന്ന പ്രദേശമായി കാട്ടുന്നതു. അവിടെ ഇപ്പോൾ ഒരു വീട്ടിലും ഇപ്പോൾ പെൺകുഞ്ഞുങ്ങൾ ഇല്ല - സ്ത്രീകൾ ഇല്ല - കഴിഞ്ഞ പതിനഞ്ച് കൊല്ലങ്ങളായി ആരും അവിടെ കല്യാണം കഴിച്ചിട്ടില്ല, അതു കൊണ്ട് പെൺകുട്ടികൾ ആരും തന്നെ വളർന്നു വരുന്നും ഇല്ല. ടോട്ടൽ പുരുഷന്മാർ മാത്രമുള്ള ഒരു ലോകം.. പുരുഷന്മാർ പ്രായ ഭേദമന്യേ പെൺകുട്ടികളെ അന്വേഷിച്ച് നടക്കുകയാണു - പുരുഷ ധനം കൊടുക്കുവാൻ തന്നെ തയ്യാറാണു അവർ. ലക്ഷങ്ങൾ വിലമതിക്കുന്ന അമൂല്യമായ ഒരു സ്വത്തായി മാറിക്കഴിഞ്ഞു സ്ത്രീ ജന്മങ്ങൾ..  പെണ്ണുങ്ങളെ കിട്ടാതെ പുരുഷ ജനം വലയുന്നു - പശുക്കളിൽ പോലും സ്ത്രീശരീരത്തെ അവർ തിരയുന്നു ..

അവിടത്തെ ഒരു ഉയർന്ന ജാതിയിൽ പെട്ട പ്രമാണിയുടെ വീടാണു കഥയുടെ കേന്ദ്ര സ്ഥാനം - അവിടെ അഞ്ച് മക്കൾ, ഒരു അച്ഛൻ. പെണ്ണന്വേഷിച്ച് ആശ നശിച്ചിരിക്കുമ്പോൾ ആണു ദൂരെ ഒരു ഗ്രാമത്തിൽ ഒളിപ്പിച്ച് വളർത്തിയ ഒരു പെൺകുട്ടിയെപറ്റി അവർ അറിയുന്നതു - ആ പെണ്ണിനെ മൂത്ത മകനു വേണ്ടി ആലോചിക്കുന്നു, പക്ഷെ പെൺകുട്ടിയുടെ അച്ഛൻ ഇളയ മകനെ തിരഞ്ഞെടുക്കുന്നു - പക്ഷെ ബുദ്ധിശാലിയായ ആ പ്രമാണി ഒരു മകനു 2 ലക്ഷം രൂപ കണക്കാക്കി അഞ്ച് മക്കൾക്കുമായി പത്തു ലക്ഷം കാഷ് പേയ്മെന്റിൽ ആ പെണ്ണിനെ മരുമകളാക്കി ‘വാങ്ങുന്നു‘. 

തുടർന്നുള്ള കഥയാണു മാതൃഭൂമി - അ നേഷൻ വിത്തൗട്ട് വുമെൺ...



വെർഡിക്ട് : ഉഗ്രൻ!. :) ഇങ്ങനത്തെ ഒരു പടത്തെപ്പറ്റി കേട്ടിട്ടു തന്നെ വളരെ കുറച്ച് നാളുകളേ ആയിട്ടൊള്ളൂ. ഏതോ ബ്ലൊഗിനു അതിനു ടാങ്ക്സ് - ആ ബ്ലോഗിന്റെ പേരു മറന്നു.! നല്ല സംവിധാനം, നല്ല ലൊക്കേഷൻ, നല്ല സിനിമാറ്റോഗ്രാഫി ...  പക്ഷെ സിനിമയിൽ ഉള്ള മെസ്സേജുകളുടെ അളവും, അവയുടെ അടിയൊഴുക്കും ഒരല്പം കൂടിപ്പോയോ എന്നു എനിക്ക് സംശയമുണ്ട്.. അവസാനം കൊണ്ടേ ക്ലൈമാക്സ്  നശിപ്പിക്കുകയും ചേയ്തു എന്നു തോന്നി എനിക്ക്. വെറുതേ ഒരു കലാപം അവസാനം കൂട്ടിച്ചേർക്കേണ്ട ഒരു കാര്യവും ഇല്ലായിരുന്നു! ഒരു വഴിക്ക് പോകുവല്ലേ, എന്നാൽ കിടക്കട്ടെ കുറച്ച് അധഃകൃത-ഉയർന്ന ജാതി കലാപവും കൂടെ എന്നു തോന്നിക്കാണും സംവിധായകനു.

പക്ഷെ, പടം : മസ്റ്റ് സീ ആണു. :)


Monday, November 1, 2010

അജാമി - Ajami (8/10)


Hebrew-Arabic/2009/Crime-Drama/IMDB/(8/10)

പ്ലോട്ട് : ഒരു സിനിമ - ഒരു കഥ - അഞ്ച് ചാപ്റ്റേഴ്സ് - അഞ്ച് കഥാപാത്രങ്ങൾ - അഞ്ച്  തമ്മിൽ ഇഴ ചേർന്നു കിടക്കുന്ന കഥകൾ.. മൊത്തത്തിലുള്ള കഥയുടെ ഗതിയെ, കഥയെപറ്റിയുള്ള കാണികളുടെ മനസ്സിന്റെ പ്രൊജക്ഷനെ ആ അഞ്ച് കഥകളും കൂടെ നിയന്തിക്കുന്നു, കാണികളെ കഥയുടേതായ ഒരു മായാ വലയത്തിൽ അകപ്പെടുത്തുന്നു ഈ സിനിമ. Rashomon സ്റ്റൈലിൽ എടുത്തിരിക്കുന്ന ഈ സിനിമ എന്നെ ഒരിക്കൽ കൂടെ കാണാൻ പ്രേരിപ്പിക്കുകയാണു, എനിക്കുറപ്പാണു, ഒരിക്കൽ കൂടി കണ്ടാൽ ഈ സിനിമയെ ഞാൻ ഇനിയും അധികം സ്നേഹിക്കും.

സിനിമ ഇസ്രയേലിലെ ജാഫാ പ്രവിശ്യലിലെ അജാമി എന്ന സ്ഥലത്ത് നടക്കുന്ന കഥയാണു. ഇസ്രയേൽ ആയതു കൊണ്ട് ഭാഷ രണ്ടാണു ഈ സിനിമയിൽ-  അറബികൾ തമ്മിൽ അറബിയും, ഇസ്രയേലികൾ തമ്മിൽ ഹിബ്രുവും സംസാരിക്കുന്നു - ഇവർ പരസ്പരമുള്ള സംസാരം ഹിബ്രുവിലും ആണു. കൂടുതൽ കഥ പറയുന്നില്ല - അത് സിനിമ കണ്ട് രസിക്കൂ. :)

വെർഡിക്ട് : ദി മെമെന്റോ (The Memento) ആണോ ഇതാണൊ ബെറ്റർ സിനിമ എന്നു എനിക്കിപ്പോൾ ഡൗട്ട് ആയി! ( ലോകസിനിമയിലെ ഏറ്റവും നല്ല പടങ്ങളിൽ ഒന്നു എന്നു ജനങ്ങൾ വിശേഷിപ്പിക്കുന്ന മെമെന്റോവും ഇതും തമ്മിൽ താരതമ്യപ്പെടുത്തിയതിനു പോലീസ് പിടീക്കില്ലാ എന്നു വിശ്വസിക്കുന്നു - അങ്ങനെ എങ്ങാനും ഉണ്ടെങ്കിൽ ഞാൻ മിനിങ്ങാന്നേ സ്ഥലം കാലിയാക്കി എന്നു നേരത്തേ അറിയിക്കുകയാണു) .
ഓരോ കഥകൾ നമ്മുടെ മുന്നിലേക്ക് വരും തോറൂം മൊത്തത്തിലുള്ള കഥക്കുണ്ടാവുന്ന മാറ്റം - അതു ഉഗ്രനാണു. അതാണു ഈ സിനിമയുടെ ഹൈലൈറ്റും! ഫിലിം സംഭവം കലക്കൻ. !!

കാണൂ .. ബോറടിക്കില്ല.

വാൽക്കഷ്ണം : ഞാൻ കണ്ട പ്രിന്റ് ഹിബ്രു ഹാർഡ്-സബ്ബ്റ്റൈറ്റിൾഡ് ആയിരുന്നു. അതുകൊണ്ട് ഇംഗ്ലീഷ് സബ്റ്റൈറ്റിത്സ് കൂടെ ഇട്ട് ലൊക്കേഷൻ അഡ്ജസ്റ്റ് ചേയ്താണു കണ്ടതു. .. സബ്റ്റൈറ്റിത്സ് ഉള്ള പ്രിന്റ് നോക്കി സെലക്സ് ചേയ്താൽ നല്ലതു.


Thursday, October 28, 2010

T D ദാസൻ - സ്റ്റാൻഡേർഡ് VI B (7.5/10)


Malayalam/2010/Drama/IMDB/(7.5/10)

 പ്ലോട്ട് : പാലക്കാട്ടെ ഒരു ഗ്രാമത്തിൽ നിന്നും ഒരു പയ്യൻ - ദാസൻ - സ്വന്തം അച്ഛനു അയക്കുന്ന എഴുത്ത് വഴിതെറ്റി എത്തിപ്പെടുന്നതു ബാഗ്ലൂരിലെ ഒരു ആഡ് ഫിലിം ഡയറക്ടർ ആയ ബിജു മേനോന്റെ വീട്ടിലാണു.  ആ എഴുത്തിലെ ഉള്ളടക്കം ആ ആറാം ക്ലാസ്സ് പയ്യന്റെ ഹൃദയം തന്നെ ആണു എന്നു അറിയുന്ന ബിജുമേനോൻ ദാസന്റെ അച്ഛനെ കണ്ടു പിടിച്ച് എഴുത്ത് എങ്ങനെയെങ്കിലും എത്തിച്ചു കൊടൂക്കാൻ വീടു കാര്യസ്ഥനോട് (ജഗദീഷ്) ആവശ്യപ്പെടൂന്നു. അങ്ങാരു അതു ചുരുട്ടിക്കൂട്ടി ചവറ്റു കൊട്ടയിൽ ഇടുന്നതു കണ്ട ബിജുമേനോന്റെ (ഏകദേശം ദാസന്റെ അതേ പ്രായമുള്ള) മകൾ എടൂത്തു വായിക്കുകയും, ആ എഴുത്തിനു മറുപടി എഴുതുകയും ചേയ്യുകയും ചേയ്യുന്നു... ബിജു മേനോൻ ആവട്ടെ, വഴി തെറ്റി ആ എത്തുന്ന എഴുത്തിനെ ബേസ് ചേയ്തു ഒരു സിനിമ പ്ലാൻ ചേയ്യുന്നു, ആ കഥ ഡെവലപ്പ് ചേയ്യാൻ ശ്രമിക്കുന്നു .. പക്ഷെ സാങ്കല്പികമായ ആ കഥയെ നിഷ്പ്രഭമാക്കി ശരിക്കുമുള്ള കഥ നീങ്ങുന്നു.. അതാണു ഈ സിനിമ.

വെർഡിക്ട് : ആദ്യേ പറയട്ടെ, സൂപ്പർ താരങ്ങളുടെ വളിപ്പു സിനിമകളെക്കാളും അമാനുഷ്യ നായക സങ്കല്പത്തെ ഉറപ്പിക്കുന്ന പടങ്ങളെക്കാളും മലയാള സിനിമക്ക് വേണ്ടതു ടി ആർ ദാസന്മാർ ആണു. തീയറ്ററിൽ ഇനിഷ്യൽ പുൾ ഒട്ടും തന്നെ കിട്ടാൻ സാധ്യതയില്ലാത്ത താരങ്ങളെ വച്ചുള്ള ഒരു പരീക്ഷണ സിനിമ - ഒരു കൊച്ചു സിനിമ, അതും ഒരു പുതുമുഖ സംവിധായകന്റെ വക. ഒരു നല്ല്ല സീരിയസ് സിനിമയിൽ വേണ്ടതെല്ലാം ഇതിലുണ്ട്. ബിജുമേനോൻ ആണു നായകൻ എന്നതു കൊണ്ടോ, കുട്ടികളുടെ സിനിമ ആണു ഇതു എന്നുള്ള തോന്നൽ വന്നതു കൊണ്ടോ, സിബിമലയിലിന്റേയോ സത്യൻ അന്തിക്കാടിന്റേയോ അല്ലാ സംവിധാനം എന്നുള്ളതു കൊണ്ടോ ഈ സിനിമ ഡി വി ഡി എടുത്ത് കാണാൻ പോലും മടിക്കുന്ന ആളാണു നിങ്ങളെങ്കിൽ, നിങ്ങൾ ഒരു വളരേ നല്ല സിനിമ ആണു മിസ്സ് ആക്കുന്നതു. 

മോഹൻ രാഘവൻ ആണു താരം. തിരക്കഥയും സംവിധാനവും ഈ പുതുമുഖം മനോഹരമായി ചേയ്തിരിക്കുന്നു. ഇങ്ങാരുടെ പടങ്ങൾക്കായി ഞാൻ ഇനി കാത്തിരിക്കും. ഉറപ്പ്. 

തെറ്റുകളും കുറ്റങ്ങളും കണ്ടു പിടീക്കാൻ ആണേങ്കിൽ കണ്ടു പിടീക്കാം ധാരാളം - കുട്ടികളുടെയും ശ്രുതി മേനോന്റെയും അഭിനയത്തിലെ സ്വാഭാവികതക്കുറവുകളും, (പ്രത്യേകിച്ച് സപ്പോർട്ടിങ്ങ് കുട്ടികളുടെ റോളുകൾ). സ്വപ്നത്തിലേയും,  സിനിമയിലെ-സിനിമയിലെയും കഥാപാത്രങ്ങളുടെ മുഖങ്ങളും ഒറിജിനൽ മുഖങ്ങളും ഒന്നായി കാട്ടുന്നതും മറ്റും എനിക്ക് ഒരല്പം സുഖക്കുറവ് തന്നു. ഒരു പക്ഷെ ആ സങ്കല്പ-കഥാപാത്രങ്ങൾക്ക് വേറേ മുഖങ്ങൾ ആയിരുന്നുവെങ്കിൽ സിനിമയുടെ മാറ്റു കൂടിയേനേ എന്ന് എനിക്ക് തോന്നി. (പക്ഷെ അങ്ങനെ ആയിരുന്നു എങ്കിൽ അതു ജനത്തിനു പറഞ്ഞു കൊടുക്കാൻ എഴുതിക്കാണിക്കുകയോ, മോർഫിങ്ങ് റ്റൈപ്പ് ഗ്രാഫിക്ക്സോ വേണ്ടി വന്നേനെ, മലയാളത്തിൽ!  :)   )

പക്ഷെ - ഇതൊന്നും ഈ സിനിമയുടെ ക്വാളിറ്റിയെ തെല്ലും ബാധിക്കുന്നില്ല. ഉഗ്രൻ - അതു മാത്രം ആണു വെർഡിക്ട്.  കാണാതിരിക്കരുതു ഈ സിനിമ. 

വാൽക്കഷ്ടം :  തീയറ്ററിൽ പോയി ഈ സിനിമ കാണാൻ സാധിച്ചില്ലാല്ലോ എന്നു മാത്രം ആണു എന്റെ ദുഃഖം - പക്ഷെ ഈ സിനിമയുടെ പോസ്റ്ററിലെ പശ ഉണങ്ങും മുന്നേ തന്നെ വേറേ പോസ്റ്റർ തീയറ്ററുകാർ അതിനു മുകളിൽ ഒട്ടിച്ചിരുന്നു ഇവിടെ. മിക്കടത്തും അങ്ങനെ ആയിരുന്നിരിക്കണം.! ഇതു പോലെ തന്നെ ആയിരുന്നു രഞ്ജിത്തിന്റെ കേരളാ കഫേയുടെ ഗതിയും. ആ പടം വന്നതും പോയതും ഞാനറിഞ്ഞില്ല!. :)

തീയറ്ററുകാർ ഒരല്പം പോലും സപ്പോർട്ട് നല്ല പടങ്ങൾക്ക് കൊടൂക്കുന്നില്ലാ എങ്കിൽ മലയാള സിനിമകൾ മൊത്തം പൊട്ടും - തീയറ്ററിൽ സിനിമ കാണുന്ന ശീലം തന്നെ മലയാളികൾ മറക്കും. അതു തീയറ്ററുകളുടെ തന്നെ നാശത്തിനു ഇടയാക്കും.. 

ഇതു തീയറ്ററുകൾ മനസ്സിലാക്കിയാൽ അവർക്ക് കൊള്ളാം !


Saturday, October 9, 2010

പ്രാഞ്ചിയേട്ടൻ ആൻഡ് ദി സെയിന്റ് : Pranchiyettan & The Saint (9/10)


Malayalam/2010/Satire/(9/10)

വെർഡിക്ട് ചുരുക്കത്തിൽ : മലയാളത്തിൽ അപൂർവ്വം ആയിട്ട് മാത്രം വരുന്ന, മിസ്സ് ആക്കാൻ പാടില്ലാത്ത ഒരു പടം.

പ്ലോട്ട് : വിദ്യാഭ്യാസമോ സമൂഹത്തിൽ ആഡ്യത്വമോ ഇല്ലാത്ത ഒരു പുത്തൻപണക്കാരൻ കോടീശ്വരൻ - ഫ്രാൻസീസ് എന്ന പ്രാഞ്ചിയേട്ടൻ എന്ന അരിപ്രാഞ്ചി. പണം എറിഞ്ഞോ വിലക്ക് വാങ്ങിയോ എങ്ങനെയെങ്കിലും സമൂഹത്തിൽ ഒരു ആദരവ് വാങ്ങാൻ ശ്രമിക്കുന്ന അരിപ്രാഞ്ചിയുടെ കഥയാണു ഈ സിനിമ.

സിനിമയുടെ കഥ തുടങ്ങുന്നതു, സ്വന്തം പിതൃക്കളെ കാണാൻ സിമിത്തേരിയിൽ എത്തുന്ന പ്രാഞ്ചിയെ കാണിച്ചു കൊണ്ടാണു. അവരുടെ നിർദ്ദേശപ്രകാരം പള്ളിയിൽ ചെന്നു ഫ്രാൻസിസ് പുണ്യാളനെ കണ്ട്, തന്റെ അടുത്ത നടപടിക്ക് അനുവാദം ചോദിക്കുന്ന പ്രാഞ്ചി കണ്ണ് തുറക്കുമ്പോൾ കാണുന്നതു ചക്കക്കുരു-ചൊടിയോടെ മുന്നിൽ നിൽക്കുന്ന പുണ്യാളനെ ആണ്. അദ്ദേഹത്തോട് തന്റെ കഥ പറയുന്നത് ആയിട്ടാണു പിന്നെ കഥ നീങ്ങുന്നതു.

വെർഡിക്ട്  : അസാധാരണമായതു ഒന്നും ഇല്ലാത്ത, തികച്ചും സാധാരണമായൊരു കഥ. ആ കഥയിലേക്ക് ഒരു തോന്നലോ, വിശ്വാസമോ ഒക്കെ ആയ പുണ്യാളനെ കൂടെ കൂട്ടിച്ചേർത്തപ്പോൾ ഉണ്ടാവുന്ന ആ എഫക്ട് - അതു പറഞ്ഞറിയിക്കാനാവാത്തതാണു. ഈ സിനിമയുടെ സൃഷ്ടാക്കൾക്ക് ആ ജീനിയസ് നീക്കത്തിനു  കൊടുക്കണം പത്തിൽ പത്ത്.  പുണ്യാളൻ എന്ന കഥാപാത്രമില്ലാതെ ‘പ്രാഞ്ചിയേട്ടൻ’ മാത്രം ആയിട്ട് ആയിരുന്നു ഈ കഥ മുന്നോട്ട് പോയിരുന്നെങ്കിൽ മറ്റൊരു ആവറേജ് സിനിമ ആയേനെ ഇതും - പക്ഷെ സ്പെഷ്യലിൽ കുറഞ്ഞ് ഒന്നും തന്നെ ഇഷ്ടമില്ലാത്ത രഞ്ജിത്ത് ആ കഥാപാത്രത്തെ ബുദ്ധിപൂർവ്വം ചേർത്തു, അങ്ങനെ നമുക്ക് ഒരു നല്ല സിനിമ കിട്ടി പ്രാഞ്ചിയേട്ടൻ ആൻഡ് ദി സെയിന്റ്-ലൂടെ.

തുവാനത്തുമ്പികൾ എന്ന സിനിമക്ക് ശേഷം തൃശൂർ ഭാഷയിൽ സംസാരിക്കുന്ന നായകൻ - ആ നായകന്റെ എല്ലാ തോൽ‌വികളും ജനം കൈകൊട്ടോടെ ഏറ്റുവാങ്ങുകയാണു. നായകൻ തോറ്റ് ബോധശൂന്യനായി കസേര‌ഉൾപ്പെടെ വീഴുമ്പോഴും ജനം ആഘോഷിക്കുകയാണു തീയറ്ററിൽ - ആഘോഷിക്കാൻ നിർബന്ധിതരാക്കുകയാണു സംവിധായക-തിരക്കഥാ‌-സംഭാഷണ ഡിപ്പാർട്ട്മെന്റ് കൈകാര്യം ചേയ്ത രഞ്ജിത്ത്. :) 

സിനിമയിൽ ആദ്യാവസാനം ഹാസ്യവും ആക്ഷേപ ഹാസ്യവും ഇടകലർന്നുള്ള സംഭാഷണങ്ങൾ ആണ് - ആദ്യ ഷോട്ട് മുതൽ അവസാന അഞ്ച് മിനുട്ട് വരെ ഈ പ്രതിഭാസമുണ്ട് - സാധാരണ അവസാന മിനുറ്റിൽ ഒക്കെ കട്ട-‌ടെൻഷൻ ആയിരിക്കും - അല്ലാ എങ്കിൽ ആക്കാനുള്ള കട്ട-ശ്രമം ആയിരിക്കും - അതിനൊന്നും രഞ്ജിത്ത് ഈ സിനിമയിൽ ശ്രമിച്ചിട്ടേ ഇല്ല. ക്ലൈമാക്സിൽ (അങ്ങനെ വിളിക്കാമെങ്കിൽ - സിനിമയുടെ അവസാനം എന്നു വായിക്കുന്നതാണു ബെറ്റർ എന്നു തോന്നുന്നു‌) ആണു ഞാൻ ഏറ്റവും അധികം ഇരുന്നു ചിരിച്ച ഒരു ഡയലോഗ് വരുന്നതു, അതും പുണ്യാളന്റെ വായിൽ നിന്നും.

വാൽക്കഷ്ണം : “തോൽ‌വികൾ ഏറ്റുവാങ്ങാൻ ചന്തുവിന്റെ ജീവിതം ഇനിയും ബാക്കി” എന്നു പ്രാഞ്ചിയേട്ടൻ സ്വയം പറയുമ്പോഴും, പക്ഷെ അതു അംഗീകരിക്കാൻ അദ്ദേഹത്തിന്റെ ഫാൻസ് എന്ന വെട്ടുകിളിക്കുട്ടങ്ങൾ തയ്യാറല്ലാ എന്നു തോന്നുന്നു - പതിവിൽ നിന്നും വ്യത്യസ്ഥമായി കൊട്ടകയിൽ നായകന്റെ ചെരുപ്പ് കാട്ടുന്നതു മുതൽ മുഴങ്ങുന്ന വിസിലുകളും ബഹളങ്ങളും കാണാനേ ഇല്ലായിരുന്നു. കുറച്ച് അധികം നാളുകൾക്ക് ശേഷം ഒരു സിനിമ ഓപ്പണിങ്ങ് ദിവസം വലിയ ശല്യമില്ലാതെ രസിച്ച് കാണാൻ പറ്റി എനിക്ക്! .. നന്ദി രഞ്ജിത്ത്, നന്ദി! :)

 വീണ്ടും ആലോചിക്കുമ്പോൾ, നന്ദനം എന്ന സിനിമയിൽ വിജയകരമായി പരീക്ഷിച്ച ദൈവം എന്ന കഥാപാത്രം (അല്ലാ എങ്കിൽ  ‘തോന്നൽ’)  അത് വീണ്ടും രഞ്ജിത്ത് പഴയതിലും വിജയകരമായി ആഘോഷിക്കുകയാണു ഈ സിനിമയിൽ. ഈ സിനിമയുടെ വിജയത്തോടെ അത്തരം പടങ്ങളുടെ ഘോഷയാത്ര തന്നെ ഉണ്ടാവാതിരുന്നാൽ മതിയായിരുന്നു മലയാള സിനിമയിൽ! പ്രാഞ്ചിയുടെ ഫ്രാൻസിസ് പുണ്യാളാ, ഈ സിനിമാക്കാർക്ക് സൽബുദ്ധി തുടർന്നും കൊടുക്കേണമേ..

സിനിമയിലെ ധാരാളം സന്ദർഭങ്ങൾ ഇപ്പോഴും മനസ്സിൽ ബാക്കി നിൽക്കുന്നു - പുണ്യാളൻ ആറ് വരക്കുന്നതു, മലയാളം അറിയാത്ത പുണ്യാളനോട് മലയാളികൾ പ്രാർത്ഥിച്ചതിലെ അർത്ഥശൂന്യത പറയുന്ന ഡയലോഗ്, അങ്ങനെ അങ്ങനെ ...

ശ്ശോ ..എനിക്ക് ഇനീം ഒന്നൂടെ ഈ സിനിമ കാണണം - ഞാൻ ഇനീം പോയി കണ്ടേക്കും ഈ സിനിമ. ! ഉമ്മ .. രഞ്ജിത്ത് .. !


Tuesday, October 5, 2010

നാൻ മഹാൻ അല്ല - Naan Mahaan Alla (7/10)

Tamil/2010/Drama-Action/IMDB/(7/10)

പ്ലോട്ട് : ഒരു സംഭവത്താൽ പരസ്പരം കൂട്ടിമുട്ടുന്ന രണ്ട് കഥകൾ നെയ്ത് ഉണ്ടാക്കിയിരിക്കുന്ന ഒരു സിനിമ ആണിതു.  നായകൻ - ജോലിക്കൊന്നും പോവാതെ ചുമ്മാ കറങ്ങി നടക്കാൻ ഇഷ്ടപ്പെടുന്ന ഒരു പയ്യൻ.അച്ഛൻ ടാക്സി ഡ്രൈവർ, അമ്മ, പെങ്ങൾ എന്നിവർ ആണു കുടുംബത്തിൽ. നായകൻ ഒരു ബഡാ പൈസക്കാരന്റെ മകളെ പ്രേമിക്കുന്നു, അതിനെ ചുറ്റിപ്പറ്റി ആണു ആദ്യ കഥ നീങ്ങുന്നതു. രണ്ടാം കഥ ഒരു പറ്റം ചെറുപ്പക്കാരെ ചുറ്റിപ്പറ്റി ആണു പറഞ്ഞു പോവുന്നതു - മയക്ക് മരുന്നും മറ്റുമായി ജീവിക്കുന്ന നാലഞ്ച് പുള്ളാർ.. ഒരു ഘട്ടത്തിൽ ഈ രണ്ടു കഥകളും കൂട്ടിമുട്ടുന്നതും, ആ കൂട്ടിമുട്ടലിന്റെ റിസൾട്ടും ആണു ഈ സിനിമ.

വെർഡിക്ട് : സംവിധാനം കിടു!. കഥ പറഞ്ഞ് പോവുന്നതു കാണുമ്പോൾ നമ്മൾ വിചാരിക്കും ഇതെന്താ ഈ സിനിമയിൽ വില്ലന്മാരില്ലാത്തതു എന്നു .. വില്ലന്മാർ ആയിട്ട് ഒരു കഥയിലെ നായകരെ കൂട്ടാമെങ്കിൽ കൂടി നായകനും ആയിട്ട് കൂട്ടിമുട്ടാതെ പരസ്പരം സമാന്തരങ്ങളായി നീങ്ങുന്ന കഥാപാത്രങ്ങൾ എവിടെ വച്ച് കൂട്ടിമുട്ടും എന്ന ഡൗട്ടും. പക്ഷെ ഈ സമാന്തര കഥാപാത്രങ്ങളെ സംവിധാന-കഥാകൃത്ത്-തിരക്കഥാകൃത്തുക്കൾ സമർത്ഥമായി കൂട്ടി മുട്ടിക്കുന്നു, തികച്ചും അപരിചിതർ ആയി തുടങ്ങുന്ന രണ്ട് കഥകളിലേയും കഥാപാത്രങ്ങൾ അങ്ങനെ തന്നെ  തുടരുകയും ചേയ്യുന്നു.

പറയാതിരിക്കാൻ ആവില്ല - പക്ഷെ രണ്ടു കഥകളിലേയും നായകരെ സംവിധായകൻ ‘വെറും വില്ലൻ’ ആയി തരം താഴ്ത്തുന്നില്ല - അവർ അവസാനം വരെ അവരുടെ വ്യൂപോയിന്റിൽ   വീരനായകർ ആണ്. അവർ അവരുടെ നിലനില്പിനായി അവസാന ഇറ്റ് രക്തം വരെ ചിന്താൻ തയ്യാറായി, അങ്ങനെ തന്നെ ചേയ്യുകയും ചേയ്യുന്നു. ചുമ്മാ നായകൻ ഒന്നു തൊടു‌മ്പോഴേക്കും അഞ്ചെട്ട് പ്രാവിശ്യം വായുവിൽ കറങ്ങി, പിന്നെ പറന്ന് ചെന്നു ഭിത്തിയേൽ ഇടിച്ച് വീണു കിടന്നു പിടയുന്ന വില്ലന്മാരുടെ കാലം കഴിഞ്ഞെന്നു തോന്നുന്നു തമിഴ് സിനിമയിൽ! അവസാന സംഘട്ടന രംഗങ്ങളിൽ ശരിക്കും നായകനായ കാർത്തിയെ കടന്നൽ ആക്രമിക്കുന്നതു പോലാണു ഇവർ ആക്രമിക്കുന്നതു - ഒരു ഘട്ടത്തിൽ നായകൻ തോൽക്കും എന്നു പോലും തോന്നിപ്പോവുന്ന തരത്തിലെ ആക്രമണം ആയിരുന്നു വില്ലന്മാരുടേതു. :) 

പിന്നെ വില്ലന്മാർ : നമ്മുടെ വഴിയിലോ മറ്റോ കാണുന്ന പോലത്തെ പുള്ളാർ ആണു ഇവറ്റ. .. കാണു, ഞാൻ ചുമ്മാ പറഞ്ഞ് രസം കളയുന്നില്ല.

എനിക്ക് വളരേ ഇഷ്ടായി, ട്രീറ്റ്മെന്റും, കഥ പറയുന്ന രീതിയും, വില്ലന്മാരേയും. :)  ഇടക്ക് സെന്റി കൊണ്ടു വരാൻ ശ്രമിച്ച പാട്ട് ആണെങ്കിൽ ബോറും ആയി!.  കണ്ടിരിക്കാവുന്ന ഒരു നല്ല സിനിമ.!

വാൽക്കഷ്ണം : ആ പെൺകൊച്ച് എന്തിനാണാവോ ഈ സിനിമയിൽ - സാധാരണ പെൺകൊച്ചുങ്ങളെ തമിഴ് സിനിമയിൽ ഉൾപ്പെടുത്തുന്നതു തന്നെ പെറ്റിക്കോട്ടും നിക്കറും ഇട്ട് തുള്ളാൻ ആണു, പക്ഷെ ഇതിൽ അതു പോലും ആ കൊച്ച് ചേയ്തിട്ടില്ല!. വേസ്റ്റ്!.


Saturday, October 2, 2010

ഉഡാൻ - Udaan (9/10)



Hindi/2010/Drama/IMDB/(9/10)


പ്ലോട്ട് : ഹോസ്റ്റലിൽ നിന്നും രാത്രി ചാടി പടം കാണുന്ന പരിപാടി പിടിക്കപ്പെട്ട്, സ്കൂളിൽ നിന്നും ഡിസ്മിസ്സ് ചേയ്യപ്പെട്ട്, നാടായ ജംഷഡ്പൂരിൽ എട്ട് വർഷത്തിനു ശേഷം എത്തുകയാണു നായകനായ പയ്യൻ.   ഈ എട്ട് കൊല്ലവും അവന്റെ അച്ഛൻ അവനെ കാണാൻ ബോർഡിങ്ങ് സ്കൂളിൽ എത്തുകയോ അവൻ അവധിക്കാലത്ത് വീട്ടിൽ എത്തുകയോ ചേയ്തിരുന്നില്ല - ബോർഡിങ്ങ് സ്കൂളിൽ നിന്നും പുറത്താക്കപ്പെട്ട് നാട്ടിൽ എത്തുന്ന അവനെ കാത്തിരിക്കുന്നതു തനി പട്ടാളച്ചിട്ടയിൽ ജീവിക്കുന്ന സ്വന്തം അച്ഛനും, അവന്റെ അച്ഛന്റെ ഏഴു വയസ്സുള്ള മകനും ആണു. - ഈ അനുജൻ ഈ ഭൂമിയിൽ ഉണ്ടായി എന്നു പോലും അവൻ അറിയുന്നതു വീട്ടിൽ എത്തിയ ശേഷമാണു. തുടർന്നു ആ ‘ജയിലിൽ‘  വാർഡനായ അച്ഛന്റെ ഉരുക്കു മുഷ്ടിയിൽ പെട്ട് ഗതികെടുന്ന, അതിൽ നിന്നും രക്ഷപെടാൻ ശ്രമിക്കുന്ന ഇവർ രണ്ടു പേരുടേയും കഥയാണു ഉഡാൻ.


വെർഡിക്ട് : എ വെനെസ്ഡേ’ക്ക് ശേഷം ഞാൻ കാണുന്ന ഏറ്റവും നല്ല ഹിന്ദി പടം ആണെന്നു തോന്നുന്നു ഇതു! എ വെനെസ്ഡേ’യുടെ വിജയം എന്തായിരുന്നു എന്നു വച്ചാൽ, ഒരു നിമിഷം പോലും സിനിമയുടെ മൂഡിൽ നിന്നും രക്ഷപ്പെടാൻ കാണികളെ അനുവദിച്ചില്ലാ സംവിധാന/തിരക്കഥാകൃത്ത്/സിനിമാറ്റോഗ്രാഫി കൈകാര്യം ചേയ്തവർ എന്നതാണു.   അതിനൊപ്പമോ അതിൽക്കൂടുതലോ നമ്മളെ സിനിമയുടെ മൂഡിലേക്ക് എത്തിക്കാൻ കഴിഞ്ഞൂ ഉഡാന്റെ സൃഷ്ടാക്കൾക്ക് എന്നതാണു ഈ കൊച്ചു പടത്തിന്റെ വിജയം.

സിനിമയുടെ സൃഷ്ടാക്കൾ വേറോരു കാര്യത്തിൽ എന്റെ മുഴുവൻ ആദരവും നേടുന്നുണ്ട് ഈ സിനിമയിലൂടെ - (വില്ലൻ എന്നു പറയാൻ ആവില്ലാ എങ്കിലും) വില്ലനായ അച്ഛന്റെ കഥാപാത്രത്തെ, വെറും  വില്ലനായി അധപതിപ്പിക്കുന്നില്ല അവർ. പകരം അദ്ദേഹത്തിന്റെ വിചാരങ്ങൾ നമ്മളിലേക്കെത്തിക്കാൻ ശ്രമിക്കുക വഴി ആ കഥാപാത്രത്തോടും മാന്യത പുലർത്തിയിരിക്കുന്നു അവർ. വേറേ സിനിമകളിൽ കാണാൻ ബുദ്ധിമുട്ടുള്ള ഒരു സംഗതി ആണിതു.

അഭിനയിച്ചിരിക്കുന്നവർ - അതു ആ കൊച്ചൻ ആണെങ്കിലും ശരി, നായകൻ പയ്യൻ ആണെങ്കിലും ശരി, അച്ഛൻ ആണെങ്കിലും ശരി, അത്യുഗ്രൻ ആയിട്ട് വന്നിട്ടുണ്ട് - ആരേയും മോശം പറയാനില്ലാ എനിക്ക്.  പിന്നെ പ്രത്യേകം എടുത്ത് പറയേണ്ടതു കാസ്റ്റിങ്ങ് ഡയറക്ടറുടെ കാര്യമാണു. കഥാപാത്രങ്ങൾക്ക് ഇതിലും ചേർന്ന നടന്മാരേ കിട്ടില്ലാ എന്നു തോന്നുന്നു, ഈ ഭൂമിയിൽ!. ആ അച്ഛനായിട്ട് റോണിത് റോയ് ജീവിക്കുക തന്നെ ആയിരുന്നു!!..

ശരിക്കും മിസ്സ് ആക്കാൻ പാടില്ലാത്ത ഒരു പടമാണിതു. - അതു കൊണ്ടു തന്നെ ആണു ഞാൻ 9 എന്ന ഓൾമോസ്റ്റ് പെർഫക്ട് സിനിമകൾക്ക് മാത്രം കൊടുക്കാവുന്ന റേറ്റിങ്ങ് കൊടുക്കുന്നതു. ആക്ഷനോ, ത്രില്ലിങ്ങ് മോമെന്റ്സോ പറയാനില്ല - പക്ഷെ - .. മിസ്സ് ആക്കേണ്ട! ഒരു കാരണവശാലും.! :)

വാൽക്കഷ്ണം : ഈ സിനിമ നീണ്ട 7 വർഷങ്ങൾക്ക് ശേഷം കാൻസിലെ മത്സര വിഭാഗത്തിൽ ഇന്ത്യയെ പ്രതിനിധാനം ചേയ്തത്രെ! ..  യാതൊരു അത്ഭുതവും ഇല്ല അതിലേക്ക് സെലക്ഷൻ കിട്ടിയതിൽ!. ..

വേറൊരു കാര്യം .. ആ പോസ്റ്റർ കണ്ടോ .. ആ പോസ്റ്ററിൽ ഉണ്ട് മുഴുവൻ കഥയും ;)


Friday, October 1, 2010

മദരാസപ്പട്ടണം - Madarasappattanam (7/10)



Tamil/2010/Period-Drama/IMDB/(7/10)

പ്ലോട്ട് : ഒരു മദാമ്മ - നമ്മുടെ കവിയൂർ പൊന്നമ്മയെ പോലിരിക്കുന്ന നല്ല ചിരിയുള്ള മദാമ്മ  - മരിക്കാൻ തയ്യാറായി കിടക്കുവാണു, അങ്ങ് ബ്രിട്ടണിൽ. അപ്പോൾ അവർക്ക് പെട്ടെന്നു ഇന്ത്യയിൽ പോവാൻ ആഗ്രഹം ഉദിക്കുന്നു - അവർ പണ്ട് ഇന്ത്യയിൽ 1947 ൽ ബ്രിട്ടീഷുകാർ ഇന്ത്യക്ക് വെളിക്ക് ഇറങ്ങിപ്പോവാൻ മുട്ടി നിൽക്കുന്ന ടൈമിൽ മദ്രാസ് ഗവർണ്ണറുടെ മകൾ ആയി വിലസിയ സ്ഥലമാണു മദ്രാസ് എന്ന ഇപ്പഴത്തെ ചെന്നൈ. അവർ മദ്രാസിൽ എത്തി  കൈയ്യിലെ ഫോട്ടോവിൽ ഉള്ള നായകന്റെ പടവും ആയിട്ട് നടക്കുവാണു, നായകനെ കണ്ടു പിടിക്കാൻ,  കൈയ്യിലെ താലിമാല നായകനു - അല്ലാ എങ്കിൽ അവരുടെ കുടുംബത്തിനു തിരികെ കൊടുക്കാൻ, അതിനിടയിൽ പഴയ സംഭവങ്ങൾ സ്വാഭാവികമായ ഫ്ലാഷ്ബാക്കിലൂടെ നമ്മളെ കാട്ടുന്നുമുണ്ട്.

വെർഡിക്ട് : കൊള്ളാം. നല്ല പടം. നല്ല ചെറു ഹ്യൂമർ സന്ദർഭങ്ങൾ അവിടിവിടെ വിതറിയിരിക്കുന്നതു സിനിമയുടെ ആദ്യ പകുതിയെ സമ്പന്നമാക്കുന്നും ഉണ്ട്. രണ്ടാം പകുതി കഥ സീരിയസ് ആവുന്നു - ചേസും അതിജീവനത്തിനായുള്ള സമരവും ഒക്കെ നന്നായി എടുത്തിരിക്കുന്നു. ക്ലൈമാക്സ് ടച്ചിങ്ങ്.! സംവിധായകനെ, അല്ലാ എങ്കിൽ തിരക്കഥാകൃത്തിനെ അഭിനന്ദിക്കാൻ തോന്നുന്നതു ഈ പടത്തിലെ  1947 ആഗസ്റ്റ് 15ആം തീയതി എന്ന ദിവസത്തിലെ മദ്രാസ് പട്ടണം കാട്ടുന്ന രീതിയാണു.
ആര്യ നന്നായി അഭിനയിച്ചിരിക്കുന്നു - ആ നായിക - എന്നാ രസമാ ആ കൊച്ചിനെ കാണാൻ - മിസ് ടീൻ വേൾഡ് ആയിട്ട് തിരഞ്ഞെടുക്കപ്പെട്ട കുട്ടിയാണത്രെ.. ശ്ശോ .. ശരിക്കും കൊള്ളാട്ടോ..  കൂടാതെ ഇതിൽ നമ്മുടെ കൊച്ചിൻ ഹനീഫയും ഉണ്ട് - ഇതാണെന്നു തോന്നുന്നു കൊച്ചിൻ ഹനീഫയുടെ അവസാന പടം. (?) പിന്നെ ...  സോറി..   ബട്ട്, നായികയുടെ പ്രായമായ കാലം അഭിനയിച്ചിരിക്കുന്ന കവിയൂർ പൊന്നമ്മ ക്ലോണിനു നമ്മുടെ മലയാളത്തിന്റെ അമ്മയെക്കാൾ വളരെ നന്നായി അഭിനയിക്കാൻ അറിയാം,

പിന്നെ പറയേണ്ടതു, 1947 കാലഘട്ടത്തിലെ മദ്രാസ് സ്കൈലൈൻ - ട്രാം ഒക്കെ പേപ്പർ ബോർഡ് കൊണ്ട് ഉണ്ടാക്കിയിരിക്കുന്നതാണെന്നു പെട്ടന്നു മനസ്സിലാവും എങ്കിലും - നല്ല രീതിയിൽ ഗ്രാഫിക്ക്സും കലാ ഡിപ്പാർട്ട്മെന്റും പണിയെടുത്തിട്ടുണ്ട്, റിസർച്ച് നടത്തിയിട്ടുണ്ട്.

ആദ്യ പകുതി ഒരല്പം  സബ്ജക്ടിൽ നിന്നും അകന്നു നിൽക്കുന്നു എങ്കിലും, ഒരല്പം അവിടെ ഇഴച്ചിൽ ഉണ്ടെങ്കിലും, കണ്ടിരിക്കാൻ പറ്റിയ പടം. മിസ്സ് ആക്കേണ്ട. :)


Tuesday, September 28, 2010

പാ - Paa (7/10)




Paa/2009/Hindi/Drama/IMDB/(7/10)

പ്ലോട്ട് : ജാക്ക് എന്ന പടത്തിന്റെ അതേ പ്ലോട്ട് + പയ്യന്റെ മാതാപിതാക്കളുടെ റൊമാൻസ് + അച്ഛനില്ലാത്ത മകൻ + അതിന്റെ ദേഷ്യം അച്ഛനോട് + കുറച്ച് തമാശകൾ + സെന്റി സന്ദർഭങ്ങൾ ...  = പാ.


വെർഡിക്ട് : ഉഗ്രൻ പടം. നല്ല സ്ക്രീൻപ്ലേ, നല്ല ഡയറക്ഷൻ, നല്ല സ്റ്റോറി, നല്ല ക്യാമറാ വർക്ക് .. എല്ലാം വളരേ നല്ലതു. പക്ഷെ,  എന്തിനു അവസാന ഭാഗത്തെ സെന്റി സീനുകൾ അത്രേം സെന്റി ആക്കി ? ഒരല്പം കൂടെ മൈൽഡ് ആക്കിയിരുന്നെങ്കിൽ എന്നു ഞാൻ ആഗ്രഹിച്ചു പോയി - പക്ഷെ, അതു ഈ സിനിമയുടെ മാറ്റ് കുറക്കുന്നില്ല കേട്ടോ. :)  ‘ചീനി കം’ എന്ന പടത്തിന്റെ ഡയറക്ടർ താൻ ഒരൊറ്റ സിനിമാ വണ്ടർ അല്ല എന്ന് തെളിയിച്ചു ഈ സിനിമയിലൂടെ. പരസ്യ ചിത്രങ്ങൾ മാത്രമല്ല, സിനിമകളുടേയും രാജാവ് താൻ തന്നെ എന്നു തെളിയിക്കും ഒരു നാൾ അദ്ദേഹം, അതുറപ്പ്.

ബച്ചന്മാർ : അച്ഛനും മകനും ഉഗ്രനായിട്ടുണ്ട്. പക്ഷെ മകൻ ആണു എന്റെ അഭിപ്രായത്തിൽ ഇതിൽ കൂടുതൽ നന്നായിരിക്കുന്നതു. മേക്കപ്പ് കൊള്ളാം - ബച്ചന്റെ മാസ്കും കൊള്ളാം. :)  പക്ഷെ ഇവരെക്കാൾ ഒക്കെ വളരെ ഉഗ്രനായിട്ടുള്ളതു വിദ്യാ ബാലൻ ആണു. കലക്കി കടുകുവറുത്തു ആ സുന്ദരി. ... ഇഷ്കിയ കഴിഞ്ഞ് ഇതും.! കൊള്ളാം !


ആ അവസാനഭാഗത്ത് എന്നെ കരയിച്ചതു കാരണം ഞാൻ ഒരു അര - ഒരു മാർക്ക് കുറക്കുന്നു. :)

വാൽക്കഷ്ണം : “Just by lending me your sperm doesn’t means he is your son” ..    വിദ്യാ ബാലൻ  കുട്ടിയുടെ അച്ഛനായ അഭിഷേക് ബച്ചനോട് ആക്രോശിക്കുന്ന ഡയലോഗ് ആണിതു. .. ഹിന്ദി സിനിമകളിൽ   മെച്വർ ആയ സംഭാഷണങ്ങൾ ജെനറൽ കാറ്റഗറി സിനിമകളിലേക്ക് കടന്നു വന്നു തുടങ്ങിയിരിക്കുന്നു  നേരത്തെ മഹേഷ് മഞ്ജരേക്കറുടേയും മറ്റും സിനിമകളിൽ പച്ചത്തെറി പറഞ്ഞിരുന്നു എങ്കിലും,  ഒരു മുഖ്യധാരാ സിനിമയിൽ - അതും കുട്ടികൾ മുഖ്യ പ്രേക്ഷകർ ആയിട്ട് വരാൻ സാധ്യതയുള്ള ഒരു സിനിമയിൽ ഇത്തരം ഡയലോഗുകൾ ഒരു ചേഞ്ച് തന്നെ ആണ്. കൊള്ളാം.  !

ജാക്ക് എന്ന പടത്തെപ്പോലെ നല്ലോരു പടം - ഒരു കണ്ടിരിക്കേണ്ട പടം. :)


Sunday, September 26, 2010

സോൾട്ട് - Salt (6/10)


Salt/English/Action/IMDB/(6/10)
Rated PG-13 for intense sequences of violence and action.

പ്ലോട്ട് : നായിക ആഞ്ചലീനാ ജോലി - ജോലി സി.ഐ.എ യിൽ.  ഒരു സുപ്രഭാതത്തിൽ ഒരു മുൻ-റഷ്യൻ സ്പൈ  ആപ്പീസിൽ കയറി ചെന്നു അടുത്ത രണ്ട് ദിവസങ്ങൾക്കകം ആഞ്ചലീനാ ജ്വാലി റഷ്യൻ പ്രസിഡന്റിനെ തട്ടിക്കളയും എന്നു വെളിപ്പെടുത്തുന്നു - കാരണം അവൾ പണ്ട് മുതലേ ഒരു റഷ്യൻ സ്പൈ ആണത്രെ. ആസ് യൂഷ്വൽ ആഞ്ചലീനാ ജോലി സി ഐ എ യുടെ ആപ്പീസിൽ നിന്നും എല്ലാരേയും ഇടീച്ച് സൂപ്പാക്കിയിട്ട്  ചാടി പുറത്ത് വരുന്നു (എന്നാലല്ലേ സംശയം അവളുടെ നേരേ വരൂ) .. എന്നിട്ട് ഒറ്റക്ക് എന്തോക്കെയോ തെളിയിക്കാൻ ശ്രമിക്കുന്നു.!

വെർഡിക്ട് : ആവറേജ്. നല്ല റോപ്പ് ട്രിക്ക്സ്. ചേസ്,  കോറേ കുരങ്ങൻ സ്റ്റയിൽ ചാട്ടം,  ലോറിയുടെ മുകളിൽ നിന്നും ബസ്സിന്റേയും അവിടെ നിന്നു ഓട്ടോ റിക്ഷയുടേ മുകളിലേക്കും തിരിച്ചും ഒക്കെ ആയിട്ട്.  പിന്നെ വെടിവൈപ്പ് ചറപറാന്നു - അതും അമേരിക്കക്കാരെ കൊല്ലില്ല - ചുമ്മാ തോക്കെടുത്ത് തിരിച്ച് പിടിച്ച് ചന്തിക്കിട്ട് അടിക്കും - അത്രേ ചേയ്യൂള്ളൂ!. റഷ്യക്കാരെ ചറപറാ വെടിവച്ച് കൊല്ലുകയും ചേയ്യും - അതും ഓട്ടോമാറ്റിക്ക് വെപ്പൺസും ആയിട്ട് നിക്കണ ഡസൺ കണക്കിനു ചേട്ടന്മാരെ കൈത്തോക്ക് വച്ച്!  കത്തി ആവശ്യത്തിൽ കൂടുതൽ ഉണ്ട് - പക്ഷെ കണ്ടിരിക്കാം - ബോറടീക്കില്ല.


Friday, September 24, 2010

മില്ലേനിയം ട്രൈയോളജി : Millennium Trilogy (7.5/10)

Millennium Trilogy-യുടെ ആദ്യ ഭാഗമായ The Girl with the dragon tatoo നെ പറ്റി ദാ നേരത്തേ ഞാൻ ഇവിടെ പറഞ്ഞിരുന്നു. ഇതിന്റെ ബാക്കി രണ്ട് ഭാഗങ്ങളും വളരേ പ്രതീക്ഷയോടെ ആണു കണ്ടതു. ആ പ്രതീക്ഷകൾ തെറ്റിച്ചില്ല ഈ സിനിമകളുടെ സൃഷ്ടാക്കൾ. ആദ്യ ഭാഗത്തിലെ കൂട്ടിമുട്ടാത്ത അറ്റങ്ങൾ അവസാന ഭാഗം ആയ The Girl Who Kicked the Hornets' Nest  ആവുമ്പോഴേക്കും കൂട്ടിമുട്ടുന്നുണ്ട്, ഒരു കഥാ‍പാത്രം പോലും അനാവശ്യമായി ഈ കഥയിലില്ല എന്നതു തന്നെ ഒരു വലിയ കാര്യമാണു.  ഭാഷ പ്രശ്നം ആണെങ്കിലും, നല്ല സബ്റ്റൈറ്റിത്സ് കിട്ടും ധാരാളം - പറ്റുമെങ്കിൽ കാണുക, കണ്ടാൽ കൈനഷ്ടം വരില്ല, ഗ്യാരന്റി.



The Girl who played with Fire/Sweedish/2008/Thriller/IMDB/(6.5/10)
Rated R for brutal violence including a rape, some strong sexual content, nudity and language.

പ്ലോട്ട് : The Girl with the dragon tatoo വിന്റെ രണ്ടാം ഭാഗം ആണിത്.ആദ്യ ഭാഗത്തിൽ പറഞ്ഞു നിർത്തിയ പലതിൽ നിന്നും ഈ സിനിമയിൽ കഥ മുന്നോട്ട് പോവുന്നു. ആദ്യ ഭാഗത്തിൽ നമ്മളെ കൺഫ്യൂഷ്യസ് ആക്കിയ പല ഫ്ലാഷ്ബാക്കുകൾക്കും ഉത്തരം പകുതി ആയിട്ടെങ്കിലും കിട്ടുന്നതു ഈ ഭാഗത്തിലാണു. പ്ലോട്ട് ഒരല്പം കൂടെ വലുതാവുന്നതും, വീരശൂരപരാക്രമി ആയ നായകനെ  കവച്ച് വച്ച് കഥയുടെ വേഗതയുടേയും സഞ്ചാരത്തിന്റെയും സാരഥ്യം നായിക ഏറ്റെടുക്കുന്നതും ഈ ഭാഗത്തിൽ ആണു. അന്വേഷണങ്ങൾ തുടരുന്നു - നായിക വീണ്ടും ട്രാപ്പ് ചേയ്യപ്പെടുന്നു, അജ്ഞാതരായ എതിരാളികളാൽ - രണ്ടോ മൂന്നോ കൊലപാതകങ്ങൾക്കുത്തരവാദി ആയി ആരോപിക്കപ്പെടുകയാണു നായിക.  ...





The Girl who kicked the Hornets' nest/Sweedish/2009/Thriller/IMDB/(8/10)
Rated R for strong violence, some sexual material, and brief language.

പ്ലോട്ട് : മൂന്നാമത്തേതും അവസാനത്തേതും ആയ ഭാഗമാണിത്. പ്ലോട്ട് പിന്നേയും വലുതാവുന്നു. നായകനും നായികയും വെവ്വേറെ അന്വേഷണങ്ങളിൽ ഏർപ്പെടുകയാണു ഈ ഭാഗത്തിൽ. വീണ്ടും കൊലപാതകങ്ങൾ   .... പല കാര്യങ്ങളെ പറ്റിയുള്ള അന്വേഷണങ്ങൾ ആണു സീരീസിനെ മുന്നോട്ട് നയിക്കുന്നതു തന്നെ. പ്ലോട്ട് അധികം പറയാൻ സാധിക്കില്ലാ എനിക്കിവിടെ, കാരണം ഇതിലെ ബേസിക്ക് പ്ലോട്ട് പറഞ്ഞാൽ പോലും ആദ്യ/രണ്ടാം ഭാഗത്തിന്റെ സസ്പെൻസ് ഫെയിൽ ആയേക്കാം. :)  പക്ഷെ അഗ്രങ്ങൾ കൂട്ടിക്കെട്ടുന്ന രീതിക്ക് വേണം ഫുൾ മാർക്ക്സ്. വളരേ ഇഷ്ടായി. !


 കണ്ടിരിക്കേണ്ട ഒരു സിനിമാ സീരീസ്. :) അതു മാത്രം ആണ് എന്റെ അഭിപ്രായം. !

വാൽക്കഷ്ണം : ലിസ്ബത്ത് സാലണ്ടർ കീ ജയ്!!! ഞാൻ ആ കഥാ‍പാത്രത്തിന്റെ ആരാധകൻ ആയിരിക്കുന്നു. ! 


Thursday, September 23, 2010

ദി എക്പെൻഡബിൾസ് - The Expendables (3/10)


The Expendables/English/Action/2010/IMDB/(3/10)
Rated R for strong action and bloody violence throughout, and for some language.

പ്ലോട്ട് : ബൂം .. ബ്ബൂം.. സ്ക്രാ‍ാ‍ാ‍ാഗ്ഗീ‍ീ‍ീ‍ീ‍ീ ...  ബാംഗ്.. ബാംഗ് .. ബാംഗ് .. വൂഷ് .. ഹാ ... യൂ ഡൈ ... ബാംഗ് .. ബാംഗ് ... ബൂം .. ബ്ബൂം..  ബ്ബ്ബ്ബ്ബ്ബ്ബ്ബൂ‍ൂ‍ൂ‍ൂമ്മ്മ്ം .... നോ .. യൂ കാണ്ട് ...  ബൂം .. ബ്ബൂം..   ഹ ഹ ഹ ...  ഐ കേം ഫോർ ഹെർ !!

ദി എൻഡ് !


വെർഡിക്ട് :  ...  ബാംഗ്.. ബാംഗ് .. ബാംഗ് .. ഇതൊക്കെ തന്നേയേ ഉള്ളൂ.. ചുമ്മാ കൊറേ പടക്കമേറ്, വെടിവൈപ്പ്, പെട്രോൾ ഒഴിച്ച് കത്തിക്കൽ, വെടിവച്ച് തല ചിതറിപ്പിക്കൽ, വണ്ടി ചേസ്, ചോര, .. വീണ്ടും പടക്കമേറ്, വെടീവൈപ്പ്, ഓട്ടം .. പെണ്ണിനെ രക്ഷിക്കാൻ പോകൽ .. ചളം തമാശക്ക് വേണ്ടിയുള്ള ശ്രമം .. ബ്ലാഹ് .. ബ്ലാഹ് ..!  സ്റ്റാലോൺ വീട്ടിൽ ആവിയും പിടിച്ചിരിക്കേണ്ട സമയം അതിക്രമിച്ചു. തൊലി ഒക്കെ ചുക്കി ചുളുങ്ങി ഏതാണ്ട് മാറ്റ് ഫിനീഷ് പെയിന്റടിച്ച സാൻഡ് പേപ്പർ പോലെ ആയിരിക്കുന്നു അദ്ദേഹത്തിന്റെ. . മഹാരഥന്മാർ പലരും ഒക്കെ ചുമ്മാ വന്നു പോവുന്നുണ്ട്. ആകെ മൊത്തം അപ്പൂപ്പന്മാരുടെ സംസ്ഥാന സമ്മേളനം തന്നെയാണീ പടം!

മിനിമം ലോജിക്ക് ഉള്ള പടം കാണണം എന്നാണെങ്കിൽ,  ഈ പടത്തിനു തല വൈക്കാതിരിക്കുക - എനിക്കത്രയുമേ പറയാനുള്ളു. അല്ലാ, ചുമ്മാ കൊറെ തീ ഉണ്ടകളും ഇടിയും പെരവാസ്തുബലിയും കാണാൻ ആണെങ്കിൽ ഇതാണു നിങ്ങൾക്കുള്ള പടം.


Monday, September 20, 2010

ശിക്കാർ - Shikkar (5/10)


പ്ലോട്ട് : ആരുടെയോ ഒക്കെ കൈയ്യിൽ നിന്നും ഒളിച്ച് കഴിയുന്ന നായകൻ.. നായകനെ പിടിക്കാൻ വില്ലന്മാർ വരുന്നു. ആ വേട്ടയുടെ കഥയാണു ശിക്കാർ.

വെർഡിക്ട് : ലാലേട്ടന്റെ പടമായതു കൊണ്ട് മാത്രം പറയുന്നു - പോര. അല്ലായിരുന്നേൽ ചവറ് എന്നു വിളിച്ചേനെ ഞാൻ. സംവിധായകൻ ഒരു സാദാ- സംവിധായകൻ മാത്രം. അങ്ങേരുടെ ഒരു സീൽ എങ്ങും കാണാനില്ല. ചവറു തമാശകൾ (ഉണ്ടാക്കനുള്ള ശ്രമം‌), ഡബിൾ മീനിങ്ങ് കോമഡി (അതും ശ്രമം മാത്രം), തമാശക്കായുള്ള കൊറേ താരങ്ങൾ, തല്ലു കൊള്ളാൻ അവർക്കായി വെവ്വേറേ സീനുകൾ,  സെന്റിക്കായി വേറേ ചില താരങ്ങൾ - അവരുടെ സീനുകൾ, പാട്ടിനായി വേറേ രണ്ടെണ്ണം  അഡ്ഡീഷണൽ ഇമ്പോർട്ട് ... ആകെ മൊത്തം സിനിമ കണ്ടാൽ ഓരോ ഭാഗവും വേവ്വേറേ പടങ്ങളിൽ നിന്നും കട്ട് ചേയ്ത് എടൂത്തിരിക്കുന്നതെന്നു തോന്നുന്ന വിധം ആണു നിർമ്മിതി.

ഇതെല്ലാം പറഞ്ഞത് ആദ്യ പകുതിയെ പറ്റിയാണു. പക്ഷെ അതു കഴിഞ്ഞ് സിനിമ മാറുന്നു. അത്ര കേമം ഒന്നും അല്ലാ എങ്കിലും കണ്ടിരിക്കാൻ പറ്റുന്ന വിധം ആണു രണ്ടാം പകുതി മുന്നേറുന്നതു. ആദ്യ പകുതിയുടെ ബോറടി രണ്ടാം പകുതിയിൽ ഇല്ല.  - ആദ്യ പകുതിയിലെ മോഹൻലാൽ ഒഴിച്ച് വേറേ താരങ്ങൾ മിക്കവരും തന്നെ രണ്ടാം പകുതിയിൽ ഇല്ലാ എന്നു വേണമെങ്കിലും പറയാം.  സ്നേഹ, ജഗതി, സുരാജ് വെഞ്ഞാറമ്മൂട്, ലാൽ,  തുടാങ്ങിയ വൻ താരങ്ങളെ എന്തിനാണു ഇതിൽ പിടീച്ചിട്ടിരിക്കുന്നേ ആവോ!

പക്ഷെ ലൊക്കേഷൻ കൊള്ളാം - ആകെ പച്ചമയം ! :) 

വാൽക്കഷ്ടം : ലോജിക്ക് വീട്ടിൽ വച്ച് മാത്രം പടം കാണാൻ പോവുക. ചില കഥാപാത്രങ്ങൾ സീനുകൾക്കിടെ അപ്രത്യക്ഷർ ആവുന്നു ( കലാഭവൻ മണി അഭിനയിക്കുന്ന കഥാപാത്രം ഇടക്കുള്ള ഒരു സീനിൽ കാണാതാവുന്നുണ്ട് - അങ്ങാരു ആ സീനിലുണ്ടെങ്കിൽ അടുത്ത സീനിലെ സംഭവം നടക്കില്ലാത്തതു കൊണ്ടാവണം അങ്ങാരെ മുക്കിയതു.)  സ്പെഷ്യൽ ഡ്യൂട്ടിക്ക് നിയോഗിക്കപ്പെട്ടിരിക്കുന്ന ആന്റി ടെറർ ഫോഴ്സിലേയോ മറ്റോ ഓഫീസറെ ഒരു റിട്ടയേർഡ് കാലി-പോലീസുകാരൻ ഉപദേശിച്ച് നന്നാക്കുന്നതു പോലെ  കോറേ ലോജിക്കൽ പ്രശ്നങ്ങൾ അവിടിവിടെ ഉണ്ട്.. ക്ലൈമാക്സ് ഉൾപ്പെടുന്നതിനാൽ ഞാൻ അതു ഇവിടെ പറയുന്നില്ല  :)

കണ്ട് നോക്കൂ. അഭിപ്രായം പറയൂ  :)


Monday, September 13, 2010

എത്സമ്മ എന്ന ആൺകുട്ടി - Elsamma enna Aankutty (5.5/10)


Malayalam/2010/Family/IMDB/(5.5/10)


പ്ലോട്ട് : എത്സമ്മ എന്ന നായകൻ(ആൻ അഗസ്റ്റിൻ - അതെ - നമ്മുടെ ആറാം തമ്പുരാനു ഉത്സവം നടത്താൻ ചാക്ക് കണക്കിനു നോട്ട് കെട്ടുകൾ കൊണ്ടെ കൊടൂത്ത അതേ കള്ളപ്പണക്കാരന്റെ മകൾ) - ആ നാട്ടിലെ പത്രവിതരണക്കാരിയാണു, അതു കൊണ്ട് അവിടത്തെ ലോക്കൽ പത്ര റിപ്പോർട്ടറൂം ആണു. കള്ളവാറ്റ് നിർത്തുക എന്ന സിമ്പിൾ കേസ് തുടങ്ങി മദ്യപാനിയുടെ ചെപ്പക്കിട്ട് രണ്ട് പൂശ് പൂശി അവന്റെ കള്ളൂ കുടി നിർത്തുക വരെയുള്ള ധീരകൃത്യങ്ങൾ എത്സമ്മയുടെ ഹോബികൾ ആണ്.  സ്ഥലം SI ക്കും, കൊമ്പൻ‌മീശക്കാരനും കള്ളവാറ്റുകാരനും ആയ വിജയരാഘവനും, അങ്ങേരുടെ കുളിക്കാത്ത ഗുണ്ടകൾക്കും ഒക്കെ എത്സമ്മയെ തൂറോളം പേടിയാണു. (എന്തു കണ്ടിട്ടാണേന്നു ചോദിക്കല്ലേ പ്ലീസ് - അതു ലാൽജോസേട്ടനു പോലും അറിയില്ല)

പാലുണ്ണിയെന്നു അറിയപ്പെടുന്ന നായിക(കുഞ്ചാക്കോ ബോബൻ) ആ നാട്ടിലെ മുഖ്യ ഡയറിഫാം ഉടമയും (പശുത്തൊഴുത്ത് ഉടമയെന്നു വായിക്കുക)  പാലിന്റെ കുത്തക വിതരണക്കാരനും ആണു. സ്മാർട്ടായ എത്സമ്മയോടുള്ള ഇഷ്ടം പറയാൻ പേടിച്ച് നടക്കുന്ന നായിക ആണു ഇതിൽ പാലുണ്ണി. എത്സമ്മ എന്ന നായകന്റെ ആ നാട്ടിലെ വീരകൃത്യങ്ങൾ ആണു എത്സമ്മ എന്ന ആൺകുട്ടി എന്ന പടത്തിലൂടെ ലാൽജോസ് പറയാൻ ‘ശ്രമിക്കുന്നത്’.


വെർഡിക്ട് : കാസ് പോയി!
പടം നിരാശപ്പെടുത്തി എന്നു പറഞ്ഞാൽ അതു തെറ്റാവില്ല. ക്ലാസ്മേറ്റ്സും മറവത്തൂരും രണ്ടാം ഭാവവും ഒക്കെ നമുക്ക് തന്ന ലാൽജോസിന്റെ കൈയ്യിൽ നിന്നും ഇങ്ങനത്തൊരു ഫിലിം ... പുതുമുഖ നായകൻ, ചെറിയ സെറ്റപ്പ്, മലയാള സിനിമയുടെ ഈ ദുർഘട ഘട്ടത്തിൽ വന്നതിൽ തരക്കേടില്ലാത്ത പടം - എന്നിങ്ങനെ ഉള്ള എക്സ്ക്യൂസുകൾ മുൻ‌കൂട്ടി തയ്യാറാക്കി വച്ചിട്ടില്ലാ എങ്കിൽ ഇതൊരു ഒന്നാം തരം പൊട്ട പടം ആണു. ഇതൊക്കെ തയ്യാറാക്കി വച്ച് ഒരു സഹാനുഭൂതിയോടെ ആണു പടം കാണുന്നതെങ്കിൽ, ഒരു ആവറേജ് പടവും ആണിത്. ലാൽജോസിന്റെ പിന്നോട്ട് നടത്തം തുടരുകയാണു..

ഗോളാന്തരവാർത്തകൾ എന്ന പടത്തിലെ മമ്മൂട്ടിയുടെ കഥാപാത്രത്തിന്റെ ലേഡീ പതിപ്പാണു ഈ പടത്തിലെ എത്സമ്മ.  തീയറ്ററിന്റെ കുഴപ്പം ആണോ എന്നറിയില്ല - സൗണ്ട് ഒക്കെ ഒരേ കച്ചറ - എത്സമ്മയുടെ ഡബ്ബിങ്ങ് ചിലപ്പോഴൊക്കെ  വളരേ Out of sync ! ലൊക്കേഷൻ കിടു. ചില ക്യാമറാ ആംഗിൾസും മൂവ്മെന്റ്സും വളരേ ഇഷ്ടായി.  മേക്കപ്പ്മാൻ./വുമൺ കാര്യായി അധ്വാനിച്ചിട്ടുണ്ട് -  മിക്ക കഥാപാത്രത്തിന്റേം മുഖത്ത് റോസ് പൗഡറും മറ്റും തെറിച്ച് നിൽക്കുന്നുണ്ടായിരുന്നു.

ആ കൊച്ച് തരക്കേടില്ല (സുന്ദരി ആയതു കൊണ്ട് പറഞ്ഞതാ അങ്ങനെ - ബോറാ, പക്ഷെ മെച്ചപ്പെടുവായിരിക്കും!)  കുഞ്ചാക്കോ നന്നാക്കി. ജഗതി ഉഷാറാക്കി. സുരാജ് ബോറാക്കിയില്ല. ഇന്ദ്രജിത്ത് കലക്കി - അവൻ കൊള്ളാം ഈ പടത്തിൽ. ഇന്ദ്രജിത്ത് ആണു ഈ പടത്തിലെ ഏറ്റവു മികച്ച പെർഫോർമൻസ് നടത്തിയിരിക്കുന്നതു. പക്ഷെ ഇതൊന്നും സിനിമയെ രക്ഷപ്പെടുത്തുന്നില്ല.
എന്റെ കൂടെ പടം കാണാൻ വന്ന അമ്മയെ  എനിക്ക് ഉണർത്തേണ്ടി വന്നു “സിനിമ തീർന്നു - വീട്ടിൽ പോവാം” എന്നു പറയാൻ!  ആദ്യ ഭാഗം തരക്കേടില്ല - മധ്യം അറു ബോറ് - അവസാനം ആവറേജ്.  ഇടക്ക് വന്ന കാട്ടാള ഡാൻസും സ്വപ്ന-പാട്ടും ഒക്കെ തികച്ചും അനാവശ്യമായിരുന്നു.

ലോജിക്കോ ഒന്നും നോക്കാതെ ചുമ്മാ ഒരു ടൈം പാസ് ആണു ഉദ്ദേശിക്കുന്നതെങ്കിൽ മാത്രം ഈ പടം കാണുക. ഇല്ലായെങ്കിൽ അടുത്ത തീയറ്റർ നോക്കിക്കോള്ളുക.

വാൽക്കഷ്ണം : ലാൽ ജോസ് പടങ്ങളുടെ പരസ്യങ്ങൾ എല്ലായ്പ്പോഴും വളരെ മികച്ചത് ആവാറൂണ്ട്. എത്സമ്മ എന്ന ആൺകുട്ടി എന്ന ഈ പടത്തിന്റേയും പോസ്റ്ററുകൾ വ്യത്യസ്ഥത പുലർത്തി. ചില സംഭവങ്ങൾ .. കുത്തി വലിയ പടം കാണുക.







Sunday, September 12, 2010

റോബിൻ ഹുഡ് - Robin Hood (5/10)


English/2010/Action/IMDB/(5/10)
Rated PG-13 for violence including intense sequences of warfare, and some sexual content.

പ്ലോട്ട് : കിങ്ങ് റിച്ചാർഡിന്റെ  പ്രധാന ആർച്ചർ ആയ റോബിൻ എങ്ങനെ നിയമലംഘകൻ ആയ റോബിൻഹുഡ് ആവുന്നു എന്ന കഥ.


വെർഡിക്ട് : പ്രതീക്ഷകൾ വാനോളം ആയിരുന്നു - റസ്സൽ ക്രോവിന്റെ നായക കഥാപാത്രം,  Gladiator, Black Hawk Down, Matchstick Men, American Gangster, Body of Lies എന്നിങ്ങനെ ഉള്ള കി-ക്കിടലൻ പടങ്ങളുടെ ഡയറക്ടർ ആയ റിഡ്ലി സ്കോട്ടിന്റെ ഡയറക്ഷൻ, കഴിഞ്ഞ ദശകത്തിലെ ഏറ്റവും മികച്ച സിനിമേറ്റോഗ്രാഫേഴ്സിൽ  ഒരാൾ ആയി തിരഞ്ഞെടുക്കപ്പെട്ട John Mathieson ന്റെ ഏറ്റവും പുതിയ പടം ...എന്തൊക്കെയായിരുന്നു .. അവസാനം പവനായി ശവമായി!.

പ്രതീക്ഷകളുടെ ഏഴയലത്തു വന്നില്ലാ എന്നു മാത്രമല്ല, ആദ്യ ഭാഗം ഡ്രാഗിങ്ങും ആണു പടം. മധ്യ ഭാഗവും അവസാനഭാഗവും കൊള്ളം,  അവസാന യുദ്ധംസമയത്തെ ലൊക്കേഷൻ ഗ്രാഫിക്ക്സ്,  വളരേ നല്ലതു. പക്ഷെ, വേറേ കാണാൻ ഒന്നും ഇല്ലാ എങ്കിൽ മാത്രം തല വൈക്കുക. പ്രതീക്ഷകൾ ഇല്ലാതെ പടം കാണാൻ ഇരുന്നാൽ ചിലപ്പോൾ സുഖിച്ചേക്കാം. ചൈനീസ് ഗുഡ്സ് പോലെയാണു ഈ പടം കാണാനുള്ള എന്റെ ഉപദേശം - നോ ഗ്യാരന്റി!. :)

എത്ര നാളായി കാത്തിരിക്കുകയായിരുന്നു ഈ പടം വരാനായിട്ട് - ‘ബോഡി ഓഫ് ലൈസ്‘ എന്ന പടം റിലീസിങ്ങിനായി കാത്തിരിക്കുന്ന നാളു മുതൽ എന്റെ ടോപ്പ് പ്രതീക്ഷകളിൽ ഈ പടം ഉണ്ടായിരുന്നു - ശരിക്കും മാസങ്ങളായി കാത്തിരിക്കുക ആയിരുന്നു പടം റിലീസിനും, അതു കഴിഞ്ഞ് ഡിവിഡി റിലീസിനും (അതിനു വീണ്ടും 4 മാസം എടുത്തു).   :(  ..  എല്ലാം വേസ്റ്റ്.  !!


Saturday, September 11, 2010

ദി കരാട്ടെ കിഡ് -The Karate Kid (7.5/10)


English/2010/Action-Thriller/IMDB/(7.5/10)
Rated PG for bullying, martial arts action violence and some mild language.
Cast : Jackie Chan, Jaden Smith
Director : Harald Zwart
Writers : Christopher Murphey (screenplay), Robert Mark Kamen (story)

പ്ലോട്ട് : നായകൻ :ഡ്രേ എന്ന പയ്യൻ. അവന്റെ അമ്മക്ക് ചൈനയിലേക്ക് മാറ്റം കിട്ടിയതിനാൽ അവർ ഡെട്രോയ്റ്റിൽ നിന്നും ചൈനയിലേക്ക് പോവുകയാണു. അവിടെ വച്ച് അപ്പാർട്ട്മെന്റ് കോപ്ലക്സിലെ പിള്ളാരു അവനെ ഇടിച്ച് പഞ്ചർ ആക്കുന്നു .. സ്കൂളിൽ ചെന്നപ്പോൾ അവിടേയും അതേ പുള്ളാരു .. വഴീൽ വച്ചും അവനെ ഇടിച്ച് സൂപ്പാക്കുന്നു. കൂടുതൽ ഇടി കിട്ടുന്നതിൽ നിന്നും അവർ താമസിക്കുന്ന അപ്പാർട്ട്മെന്റിലെ മെക്കാനിക്ക് രക്ഷിക്കുന്നു. വില്ലൻ പുള്ളേർക്കറിയോ, അവർ ഉരസുന്നതു ജാക്കീച്ചായനോട് ആണെന്നു? അങ്ങേരു എത്ര തല്ല് കൊണ്ടതാ - അവർ എല്ലാം നല്ലോണം അടി വാങ്ങിക്കൂട്ടുന്നു, വയറ് നിറയേ. പയ്യനു വീണ്ടും അടി കിട്ടുന്നതു തടയുവാനും ഈ പുള്ളാർ ശരിയല്ലാന്നു പറയാനും ജാക്കിയച്ചായൻ നമ്മുടെ നായകന്റെ കൂടെ അവർ കുങ്ങ്ഫൂ പഠിക്കുന്ന സ്ഥലത്തെത്തുന്നു, അവിടെ വച്ച് പ്രശ്നം തീർന്നില്ലാ എന്നു മാത്രമല്ല, ആ കൊച്ചനെ കോറേ കൂടെ അടി കൊള്ളിക്കാനുള്ള വകുപ്പ് കൂടെ ഏറ്റിട്ടാണു ജാക്കിച്ചായൻ ഇറങ്ങുന്നത് അവിടെ നിന്നും. വരുന്ന ദുർഗ്ഗാഷ്ഠമിക്ക് അവിടെ നടക്കുന്ന ഗോമ്പറ്റീഷനു പയ്യൻ ഇറങ്ങുമെന്നു ശപഥം ചേയ്തിറങ്ങുന്നു അച്ചായൻ. പിന്നെ കഥ പയ്യന്റെ കുങ്ങ്ഫൂ പരിശീലനവും, കുങ്ങ്ഫൂ കോമ്പറ്റീഷനും ഒക്കെ ആയി തീരുന്നു...

വെർഡിക്ട് : കൊള്ളാം. നല്ല സ്ക്രീൻപ്ലേ, നല്ല ആക്ഷൻ, നല്ല തല്ലുകൊള്ളൽ ആണു പയ്യൻ - ഓരോ തൊഴി ഒക്കെ കിട്ടുന്നതു കാണണം - അതിന്റെ പകുതി ശക്തീൽ ഞാൻ ഒക്കെ ഒരെണ്ണം കൊണ്ടാൽ എന്റെ കിഡ്നീടെ മെഡുലാ ഓബ്ലാംകട്ട വരെ ഫീസായിപ്പോകും! സെന്റി ഇറക്കേണ്ട സ്ഥാ‍നത്ത് അതും ഉണ്ട്, എല്ലാം ചേർത്തു വച്ചിരിക്കുന്ന ഒരു ഉഗ്രൻ പീസ്.

ജാക്കിച്ചായൻ കിടു. ശരിക്കും ഒരു പ്രായം ചെന്ന ഇൻസ്ട്രക്ടർ. ജാക്കിച്ചായൻ അദ്ദേഹത്തിന്റെ പ്രായത്തിനു ചേർന്ന ഒരു കഥാപാത്രം ചേയ്തു കണ്ടതിൽ സന്തോഷമുണ്ട്. പയ്യനും ഉഗ്രൻ. നാച്യൂറൽ ആക്ടർ ആണവൻ.!

കണ്ടിരിക്കേണ്ട ഒരു പടം ആണിത്.

വാൽക്കഷ്ണം : ഇതു ഒരു ഒർജിനൽ വർക്ക് അല്ല - റീമേക്ക് ആണു. പണ്ട് ഇതേ പ്ലോട്ടിൽ ഒരു(?) പടം ഞാൻ കണ്ടിട്ടുണ്ട് - അന്നും ഇതു സൂപ്പർഹിറ്റായിരുന്നു..


Wednesday, September 8, 2010

ലംഹാ - Lamhaa


Hindi/2010/Action/IMDB/(8/10)
Rated 'A' because of the theme - terrorism.

പ്ലോട്ട് : ഒരു കശ്മീർ കഥ. കശ്മീരിന്റെ ശത്രു ആരു എന്ന അന്വേഷണം നടത്താൻ ആണു ഈ പടത്തിൽ സംവിധായകനും കഥാ-തിരക്കഥാകൃത്തുമായ രാഹുൽ ഡോലാക്യ  ശ്രമിക്കുന്നതു. ഈ പടത്തിൽ നായകന്മാരോ വില്ലന്മാരോ ഇല്ലാ എന്നു വേണമെങ്കിൽ പറയാം, എല്ലാവരും അവരവരുടെ അല്ലാ എങ്കിൽ അവരുടെ വിശ്വാ‍സങ്ങൾക്കായി പൊരുതുന്നു, ചിലർ കശ്മീരിനായി, ചിലർ കശ്മീരികൾക്കായി, ചിലർ ഇന്ത്യക്കായി, ചിലർ പാക്കിസ്ഥാനിനായി, ചിലർ സ്വന്തം കീശ വീർപ്പിക്കാനായി പൊരുതുന്നു, ആ പോരിന്റെ കഥയാണിതു - ലംഹാ (അർഥം : ഒരു നിമിഷം.) ഡൽഹിയിൽ നിന്നും സ്പെഷ്യൽ മിഷനായി മിലിറ്ററി ഇന്റലിജൻസ് അയക്കുന്ന സ്പെഷ്യൽ ഏജന്റായി സഞ്ജയ് ദത്തും, വിഘടനവാദി ആയ ആത്മീയ നേതാവായി അനുപം ഖേറും, മുൻ തീവ്രവാദിയായി കുണാൽ കപൂറും, തീവ്രവാദി ലേഡീ വിങ്ങ് നേതാവായി ബിപാഷാ ബസുവും അഭിനയിക്കുന്നു.

വെർഡിക്ട് : പല പടങ്ങളിൽ നിന്നും അടിച്ച് മാറ്റിയ ആക്ഷൻ സീനുകൾ പടത്തിന്റെ നിറം ഒരല്പം കെടുത്തുന്നുണ്ടെങ്കിലും, ഇന്ത്യൻ സിനിമയിലെ ഒരു മാറ്റത്തിന്റെ തുടക്കമാവും ഈ സിനിമ എന്നു തോന്നുന്നു എനിക്ക്. ഈ സിനിമ ചൂണ്ടിക്കാണിക്കുന്ന വിഷയങ്ങൾ - അതു പാക്കിസ്ഥനു നേരേ ആയാലും, ഡൽഹിക്ക് നേരേയായാലും അതു അല്പം സുഖക്കുറവ് ഉണ്ടാക്കുന്നതാണേങ്കിലും,  ഈ സിനിമ മുൻ കശ്മീർ സിനിമകളിൽ നിന്നും വ്യത്യസ്ഥമാവുന്നതു അന്ധമായ ഡൽഹി സ്നേഹം ഇതിൽ ഇല്ല എന്ന കാരണത്താലാണ്.  ചുരുക്കിപ്പറഞ്ഞാൽ, ഈ സിനിമ പാക്കിസ്ഥാനേയും കശ്മീർ വിഘടനവാദത്തേയും പോലെ ഡൽഹിയുടെ കശ്മീർ നയത്തേയും പ്രതിക്കൂട്ടിൽ നിർത്തുന്നു.

അഭിനയം : മറ്റേ കക്ഷി : കുണാൽ കപ്പൂർ : എന്റമ്മോ, കിടു. സഞ്ജ‌യ് ദത്ത് ചുമ്മാ വന്നു നിന്നാൽ പോലും എനിക്കിഷ്ടാവും. മറ്റുള്ളവർ വലിയ എഫക്ട് ഉണ്ടാക്കിയില്ല.  പാട്ടുകൾ വന്നു പോയതു ഞാനറിഞ്ഞില്ല, അവ പടവുമായി അത്രക്ക് ചേർന്നു നിൽക്കുന്നു. (പക്ഷെ ഒരെണ്ണം വന്നതു ഞാനറിഞ്ഞൂ, അതു അത്ര വേണ്ട പാട്ടാണെന്നു തോന്നിയില്ല)

ബോൾഡായ ഈ സബ്ബ്ജക്ടിനാണു എന്റെ മാർക്ക്. നാട്ടാർക്ക് സുഖിക്കുന്നതു മാത്രമേ പറയൂ എന്ന കടും പിടുത്തം ഉപേക്ഷിച്ചതിനാണു എന്റെ മാർക്ക്. പാട്രിയോറ്റിസം കൊണ്ട് കാലാകാലങ്ങളായി മൂടിവച്ചിരിക്കുന്ന സത്യത്തിനെ പുറത്ത് കൊണ്ടുവരാൻ ശ്രമിക്കുന്ന ഡയറക്ടറുടെ ആ ചങ്കൂറ്റത്തിനു ആണു എന്റെ മുഴുവൻ മാർക്കും.   :)  . ഇങ്ങനെ ഒക്കെ ആയിട്ടും അകാരണമായ ഒരു ‘A' സർട്ടിഫിക്കേഷൻ കൊടുത്തെങ്കിൽ പോലും, രണ്ട് സീനുകൾ വെട്ടി മാറ്റിയെങ്കിൽ പോലും, പ്രദർശനാനുമതി നൽകിയ ഇന്ത്യയുടെ സെ‌ട്രൽ ബോർഡ് ഓഫ് ഫിലിം സർട്ടിഫിക്കേഷനു എന്റെ നൂറിൽ നൂറ് മാർക്ക്! :) ബ്രാവോ!.


വാൽക്കഷ്ടം: ബോൺ സുപ്രമസിയിലെ ലണ്ടനിലെ വാട്ടർലൂ റെയിൽ‌വേ സ്റ്റേഷൻ ആക്ഷൻ സീക്വൻസ് അതേ പടി അടിച്ച് മാറ്റിയിട്ടുണ്ട് ഈ സിനിമയിൽ.  കഴിഞ്ഞ ഓസ്കാർ നേടിയ പടമാ‍യ ഹർട്ട്‌ലോക്കറിലേയും ബോംബ് ഒളിപ്പിക്കുന്ന സീനുകൾ ഇതിലുണ്ട് (പക്ഷെ ഈ പടം 2008 ഇൽ ഷൂട്ടിങ്ങ് തുടങ്ങിയതാണു, എങ്ങനെ അപ്പോൾ ഇവർക്ക് താരതമ്യേന പുതിയ ഇംഗ്ലീഷ് പടത്തിൽ നിന്നും അടീച്ച് മാറ്റാൻ പറ്റും എന്നു എനിക്ക് അത്ര പിടി കിട്ടിയില്ല.

ഈ സിനിമ ഗൾഫ് രാജ്യങ്ങളിൽ നിരോധിച്ചിരിക്കുകയാണു - എന്തിനാണാവോ, എന്തുണ്ടായിട്ടാണാവോ!. ഈ സിനിമക്കിടയിൽ ആണു ബിപാഷാബസു പേടിച്ച് വിറച്ച് ആരോടും മിണ്ടാതെ സെറ്റിൽ നിന്നും മുങ്ങിക്കളഞ്ഞത്! പാവം - എപ്പോ വേണമെങ്കിലും  വീഴും എന്ന പോലെ തൂങ്ങിക്കിടക്കുന്ന മരണത്തിന്റെ വാളിനെ ആർക്കാണു പേടിയില്ലാത്തതു! അവസാനം ക്ലൈമാക്സ് മനാലിയിൽ വച്ച് പൂർത്തിയാക്കി സിനിമ തീയറ്ററുകളിലെത്തിക്കുകയായിരുന്നു.


Tuesday, September 7, 2010

വൺസ് അപ്പോൺ എ ടൈം ഇൻ മുംബൈ - Once upon a Time in Mumbai (7/10)


Hindi/Action-Drama-Period/2010/(7/10)

പ്ലോട്ട് : 70കളിലെ ബോംബൈ നഗരം. അധോലോക നായകന്മാർ ജനങ്ങളുടെ കണ്ണിലുണ്ണിയും ഹീറോകളും ആയി വരുന്ന കാലം.  ആ സമയത്തെ പുത്തൻ അധോലോക ഉദയം ആയി അജയ്ദേവ്ഗനും,  ആ നായകന്റെ കീഴിൽ ഉദിച്ചുയരുന്ന മറ്റോരു ക്രിമിനൽ ആയി ഇമ്രാൻ ഹാഷ്മിയും അഭിനയിക്കുന്നു. ആ കാലഘട്ടത്തിലെ അധോലോക-സിനിമാ-ബിസിനസ്സ്-രാഷ്ട്രീയ ബന്ധങ്ങളും മറ്റും ആണു കഥയുടെ ഇതിവൃത്തം. മുംബൈ സ്ഫോടനങ്ങളുടെ അന്നു സ്വയം അപായപ്പെടുത്താൻ ശ്രമിച്ച് പരാജയപ്പെടുന്ന ഹൂഡ അവതരിപ്പിക്കുന്ന ഉന്നത പോലീസ് ഓഫീസറുടെ ഫ്ലാഷ്ബാക്ക് ആയിട്ടാണു കഥ തുടങ്ങുന്നതും മുന്നേറുന്നതും അവസാനിക്കുന്നതും..

വെർഡിക്ട് : 8 അല്ലായെങ്കിൽ 8.5 വരെ റേറ്റിങ്ങ് വാങ്ങാമായിരുന്ന ഒരു പടം, അതിനുള്ള ഹോംവർക്ക് അതിന്റെ ക്രിയേറ്റേഴ്സും ആർട്ടിസ്റ്റുകളൂം ആത്മാർഥമായി ചേയ്തിട്ടുള്ള ഒരു പടം. അതിനു 7 വരെയേ (എന്റെ) റേറ്റിങ്ങ് എത്തുന്നുള്ളൂ, (അതും കടിച്ച് പിടിച്ച്) എന്നതിന്റെ ഒരേ ഒരു കാരണം ഇടക്ക് വച്ച് സംവിധായകനോ അല്ലാ എങ്കിൽ നിർമ്മാതാവിനോ നാലഞ്ച് പാട്ട് കയറ്റിയില്ലായെങ്കിൽ പടം പൊളിയുവോ എന്നുള്ള സംശയം ഉണ്ടായതാണ് അല്ലാതെ പടം മോശമായതു കൊണ്ടല്ല. പകുതി അല്ലായെങ്കിൽ മുക്കാൽഭാഗം ഡീസന്റായി മുന്നോട്ട് നീങ്ങുന്ന പടം ഇടക്ക് വച്ച് ലക്ഷ്യം നഷ്ടപ്പെട്ട് അനാവശ്യ പാട്ടുകളിലും ഡയലോഗുകളിലും പെട്ട് ഒരു കുറ്റിക്ക് ചുറ്റും വട്ടം കറങ്ങുന്നതു പോലെയാണു എനിക്ക് തോന്നിയതു, പിന്നീട് അതു ശരിയാക്കാൻ ശ്രമിക്കുന്നുണ്ട് എങ്കിലും. 

ഇതോക്കെ ആണെങ്കിലും, പടം ക്ലാസ്സ് തന്നെയാണു. 1970കളിലെ മുംബൈ (ബോംബൈ എന്നു സ്വകാര്യമായി പറയാം വേണമെങ്കിൽ ഞാൻ) വളരെ ഉഗ്രനായിട്ട് തന്നെ റീക്രിയേറ്റ് ചേയ്തിരിക്കുന്നു കലാ-ഗ്രാഫിക്ക്സ് ഡിപ്പാർട്ട്മെന്റ്. ആ സമയത്തെ ബോംബൈ സ്കൈലൈൻ കാട്ടുന്നുണ്ട് - ഉഗ്രൻ!. :)  അതു പോലെ ആ സമയത്തെ വസ്‌‌ത്രങ്ങൾ, വാഹനങ്ങൾ, സ്റ്റയിലുകൾ .. എല്ലാം കൊള്ളാം. എടുത്ത് പറയേണ്ടതു സ്ക്രീപ്ലേയും ഡയലോഗുകൾ ആണു,  ടെക്നിക്കലി വളരേ ഉഗ്രൻ.

‘D‘ എന്ന പടത്തിലെ നായകൻ ഹൂഡ ഇതിലും ഉഗ്രൻ - രാംഗോപാൽ‌വർമ്മയുടെ കണ്ടുപിടുത്തം മോശമായില്ല. അജയ് ദേവ്ഗൻ - കമ്പനിയിലെ പെർഫോർമൻസ് ഓർമ്മിപ്പിക്കുന്ന ഒരു വർക്ക് - ചാടുന്ന വളയത്തിന്റെ അളവ് കുറച്ച് കുറച്ച് കൊണ്ടു വരികയാണു അങ്ങാരു, ആദ്യ സിനിമകളിലെ അജയും ഇന്നത്തെ അജയിനെയും കമ്പയർ പോലും ചേയ്യാനാവില്ലാ എന്നു തോന്നുന്നു!.
ആദ്യമായിട്ടാവണം ഇമ്രാൻ ഹാഷ്മിക്ക് ഒരു പടത്തിൽ ഉമ്മ വൈക്കാൻ പെണ്ണിനെ കിട്ടാതിരിക്കുന്നതു.! അവന്റെ ഡീസന്റ് പെർഫോർമൻസ് ആദ്യായിട്ട് ഞാൻ കാണുവാണു. അജയ് ദേവഗനു ഒരു ചലഞ്ച് കൊടുക്കാൻ മാത്രം ഹാർഡ് വർക്ക് അവൻ ചേയ്തിരിക്കുന്നു, കൊള്ളാം. കങ്കണാറൗണത്ത് : ആദ്യായിട്ട് ഒരു പടത്തിൽ അവളെ രോഗിയോ തലക്ക് ഓളമോ മയക്ക് മരുന്നു അടിമത്തമോ ഇല്ലാതെ കാണാം എന്നു നോക്കിയിരിക്കായിരുന്നു ഇതിൽ - പക്ഷെ എന്തു ചേയ്യാം, അവൾക്കവസാനം ഹൃദയത്തിൽ ഊട്ടയാവും (ദ്വാരമാവും) ! ആ കൊച്ചിന്റെ കാര്യം പോക്കാ!(പക്ഷെ എനിക്കിഷ്ടാ ;) ‌)

അങ്ങനെ എല്ലാം കൊള്ളാം- പക്ഷെ പടത്തിന്റെ നടുവശം സ്ലോ, ആദ്യവശം കൊള്ളാം, അവസാനം ഫാസ്റ്റസ്റ്റ്. നടുവശം ഒന്നു ചെത്തി മിനുക്കി ചിന്തേരിട്ട് എടുത്തിരുന്നെങ്കിൽ ഒരു ക്ലാസ്സിക്ക് പടം ആയേനെ ഇതു!. കണ്ട് നോക്കൂ. :)

വാൽക്കഷ്ണം : അൺ‌ഒഫിഷ്യലീ, അജയ്ദേവ്ഗൻ പണ്ടത്തെയും എന്നേത്തേയും അധോലോക സുൽത്താൻ ആയ ഹാജി മസ്താൻ ആയിട്ടാണു അഭിനയിക്കുന്നതു, ഇമ്രാൻ ഹാഷ്മി ദാവൂദ് ആയിട്ടും അഭിനയിക്കുന്നു. പലയിടങ്ങളിയാലി മന്ദാകിനി, മറ്റോരു കാലഘട്ടത്തിൽ ജീവിച്ചിരുന്ന മധുബാല എന്നിവരേയും കഥയിൽ പരാമർശിച്ച് പോവുന്നുണ്ട്.


Monday, September 6, 2010

നായകൻ - Nayakan (6/10)


പ്ലോട്ട് : പ്രതികാരം ആണു കഥ. നായകൻ ഒരു കഥകളി ആർട്ടിസ്റ്റ്. തുടങ്ങുന്നതു തന്നെ നായകനും കൂട്ടുകാരും ഒരു വണ്ടി ആക്സിഡന്റിൽ ‘മരിക്കു’ന്നതാണു. പോസ്റ്റ്മോർട്ടത്തിനിടയിൽ നായകൻ ചാടി എഴുന്നേൽക്കുന്നു, അങ്ങനെ ജീവൻ രക്ഷപ്പെടുന്നു. കഥ മുന്നോട്ടും പിന്നോട്ടും ചറപറാ ഫ്ലാഷ്ബാക്കുകളിലൂടെയും ഫ്ലാഷ്ബാക്കിലെ ഫ്ലാഷ്ബാക്കിലൂടെയും ഒക്കെ നീങ്ങുന്നുണ്ട്. ഒരേ കഥ പലർ പറയുന്ന രീതിയും അവലംബിച്ചിട്ടുണ്ട്.

വെർഡിക്ട് : തുടക്കവും, കഥ പറയുന്ന രീതിയും, ടെക്നിക്കൽ കാര്യങ്ങളും ഒക്കെ നല്ലതായി എങ്കിലും ഒരു ആവറേജ് പടം ആ‍യിട്ട് അവശേഷിക്കുന്നു ഈ പടം. മോശം അഭിനയവും, മോശം സംവിധാനവും ഒക്കെക്കൂടെ അവസാന ഒരു അരമണിക്കൂർ സഹിക്കാവുന്നതിലേറെ ആക്കുന്നുണ്ട്.  ബോറഭിനയം പുതുമുഖങ്ങൾ ആണു ചേയ്യുന്നതെങ്കിൽ ക്ഷമിക്കാമായിരുന്നു, പക്ഷെ തിലകനും സിദ്ദിഖും വരെ തങ്കളുടെ റോളുകൾ ഓവർ ആക്കുന്നുണ്ട് എന്നതാണു കഷ്ടം.!

പടത്തിന്റെ പല കാര്യങ്ങളും പല ഹോളീവുഡ് പടങ്ങളിൽ കണ്ട് മറന്നതു പോലെ .. സീൻ ട്രാൻസിഷൻസും മറ്റും.  റിഡ്ലി സ്കോട്ട് സിനിമകളിലെ ഒരു സംഭവം ഓർമിപ്പിക്കുന്നു..  ക്യാമറ ഹാൻഡ് ഹെൽഡ് ജെർക്കി വർക്ക് ആണു മിക്കപ്പോഴും - പക്ഷെ എന്നിട്ടും ബോൺ സിനിമകളിലെപ്പോലെ സിനിമയിലെ സംഭവങ്ങളിലേക്ക് കാഴ്ചക്കാരനെ കൊണ്ട് ചെന്നു ആക്കാൻ സാധിക്കുന്നില്ല എന്നും തോന്നി.  കഥയിലെ പല സംഭവങ്ങൾ കഥകളിയിലെ ടെംസ് - പുറപ്പാട്, തോടയം.. എന്നിങ്ങനെ വച്ച് കാണിക്കാൻ ശ്രമിച്ചിരിക്കുന്നതു കൊള്ളാം. സിനിമ തുടങ്ങിയപ്പോഴേ സിനിമയുടെ ടെക്ക്നിക്കൽ വശം എന്നെ ആകർഷിച്ചു എന്നും ഇവിടെ പറയേണ്ടതാണു.

ഒരു പുതുമുഖസംവിധായകന്റെ പടം എന്ന നിലക്ക് ഇഷ്ടപ്പെടണം എന്നുണ്ട്  , പക്ഷെ അവസാന അരമണിക്കൂർ, അതു എന്നെക്കൊണ്ട് അതു ചേയ്യാൻ സമ്മതിക്കുന്നില്ല. അവസാന അര മണിക്കൂർ അറു ബോറ്.  ആദ്യ പകുതി സഹിക്കബിൾ. സിനിമ ആദ്യ ക്ലൈമാക്സിൽ നിർത്തേണ്ടതായിരുന്നു, എങ്കിൽ ഇതിലും വളരേ ബെറ്റർ ആയിരുന്നേനെ!


ഐ ഹേറ്റ് ലവ് സ്റ്റോറീസ് - I Hate Love Storys (6/10)


പ്ലോട്ട് : നായകൻ : ലവ് സ്റ്റോറീസിനേം ലവ് എന്ന വാക്കിനെ തന്നെയും വെറുക്കുന്നു. എന്നാൽ പുള്ളി വർക്ക് ചേയ്യുന്നതു ബോളീവുഡിലെ ടോപ്പ് ലവ് സ്റ്റോറി ഡയറക്ടറുടെ അസിസ്റ്റന്റ് ആയിട്ടാണു.  നായിക  ആസ് യൂഷ്വൽ -: ലവ് സ്റ്റോറീസിനേം ലവിനേം ഇഷ്ടപ്പെടുന്നു. ഒരു കാമുകൻ കുട്ടിക്കാലം മുതൽക്കുണ്ട് ഓൾക്ക്. പിന്നെ  വെറുക്കുന്നവന്റെ വെറുപ്പ് മാറുന്നതും കഥ സാദാ ബോളീവുഡ് മസാലപ്പടം ലെവലിലേക്ക് വരുന്നതും ഒക്കെ ആണു സംഭവം. പക്ഷെ ഒരു കാര്യമുണ്ട് കേട്ടോ - കഥയിൽ എന്തു സംഭവിക്കുന്നതിനു മുൻപും വോയിസ് ഓവറിൽ സാദാ ബോളീവുഡ് പടത്തെ കുറ്റം പറഞ്ഞു കൊണ്ട് ആണു അതേ കാര്യം ചേയ്യുന്നതു - അതൊരു ചേഞ്ച് ആണു. . ;)

വെർഡിക്ട് : ആദ്യാവസാനം ലവ് സ്റ്റോറീസിനെ വെറുക്കുന്നു വെറുക്കുന്നു എന്നു പറയുന്ന നായകൻ, സിനിമകളിലെ പാട്ടുപാടലും, വെള്ളമടിയും ഒക്കെ വെറുക്കുന്ന നായകൻ - ചേയ്യുന്നതു മൊത്തം അതാണു. പകുതി കഴിഞ്ഞാൽ പടം ശരിക്കും ഒരു കരൺ ജോഹർ പടം (പാട്ട്-വിരഹം-കുടൂംബസ്നേഹം-എയർപ്പോർട്ട്-തിരിച്ചോടൽ-പ്രേമസാഫല്യം) ആയി മാറുകയാണു. ചുമ്മാ ഓരോ സന്ദർഭങ്ങൾ ഉണ്ടാക്കി കൈയ്യടി വാങ്ങാനുള്ള വ്യഥാ ശ്രമം.


ഇനി നല്ല വശം : പകുതി വരെ, പടം വളരേ രസകരം ആയിരുന്നു. സോനം കപൂറും ഇമ്രാൻ ഖാനും ആയിട്ടുള്ള കൊ‌മ്പിനേഷൻ ആൻഡ് കെമിസ്ട്രി കിടു. ലവന്റെ കെയർഫ്രീ ആറ്റിറ്റ്യൂഡ് അഭിനയം കൊള്ളാം. പക്ഷെ ഇപ്പോഴും ആ മാനറിസംസ് ഇടക്കിടക്ക് ചാടി വീഴുന്നുണ്ട് മുഖത്തേക്ക്. സോനം കപൂർ ഇതിൽ ആണു ആദ്യായിട്ട് എനിക്കിഷ്ടാവുന്നതു. പക്ഷെ ഏറ്റവും നന്നായിരിക്കുന്നതു ..... നായകന്റെ ഫ്രണ്ട് ആയിട്ടഭിനയിക്കുന്ന ലവനാണു - സ്പ്രൈറ്റിന്റെ പരസ്യത്തിലെ തടിയൻ പയ്യൻ. ലവൻ കിടു എന്നു പറഞ്ഞാൽ പോര, കിക്കിടു!. ബാക്കി സബ്ബ് ബക്വാസ്!

പകുതി കഴിഞ്ഞാൽ ബോറാണു. പക്ഷെ ആദ്യ പകുതി കണ്ടിരിക്കാവുന്നതും ആണു. സൊ, എന്റെ അഭിപ്രായം, ഒട്ടും പേടിക്കാതെ സിഡി/ഡിവിഡി എടുത്തോളുക, പകുതി കണ്ടോളുക, പകുതി കഴിഞ്ഞ് ബോറടിക്കുന്നു എങ്കിൽ നിർത്താം, എന്നാലും സിഡി വാടക നഷ്ടമാവില്ല.!  പകുതി കഴിഞ്ഞും മറ്റേ സ്പ്രൈറ്റ് നടന്റെ ന‌മ്പേഴ്സ് ഉണ്ട്, പക്ഷെ ആദ്യ പകുതിയുടെ അത്രേം ഇല്ല.  , എനിക്കിഷ്ടായി, പക്ഷെ മിക്ക റിവ്യൂസും പടം വളരേ മോശം എന്നാണു, അതു കൊണ്ട് സ്വന്തം റിസ്കിൽ കാണുക.  ഈ സജ്ജക്ഷനു ഞാൻ മുൻ‌കൂർ ജാമ്യം എടുക്കുന്നു!

വാൽക്കഷ്ടം : സ്പെല്ലിങ്ങ് തെറ്റിച്ച് എഴുതുന്ന പരിപാടിയേ എനിക്കിഷ്ടാല്ല, എനിക്ക് അക്ഷരപിശാശിന്റെ ബാധ ഉണ്ടെങ്കിൽ പോലും. അപ്പോഴാണു ഈ പടത്തിന്റെ ടൈറ്റിലിൽ തന്നെ സ്പെല്ലിങ്ങ് മിസ്റ്റേക്ക്!.. ഇഡീയറ്റ്സ്!


Sunday, September 5, 2010

ഗ്രീൻബർഗ് -Greenberg (5/10)





ഗ്രീൻബർഗ്ഗ്/Greenberg/2010/Romantic comedy/IMDB/(5/10)
 Rated R for some strong sexuality, drug use, and language.

റൊമാന്റിക്ക് കോമഡി. റൊമാന്റിക്ക് എന്നു വേണമെങ്കിൽ പറയാം - പക്ഷെ  കോമഡി? നായകൻ ഒരു അരക്കിറുക്കൻ. ചിന്തകൾ കാടു കയറി, സോപ്പിനു പത പോര, അമേരിക്കൻ എയർലൈൻസിനു ഒച്ച കൂടുതലാണു എന്നു തുടങ്ങി കണ്ടതിനും കാണാത്തതിനും വരെ കമ്പനി ഉടമസ്ഥർക്ക് പരാതി കൊടുക്കാൻ മടിക്കാത്ത ഒരു 40കാരൻ. ഡിപ്രഷൻ തെറാപ്പി കഴിഞ്ഞ് ചേട്ടന്റെ വീട്ടിൽ എത്തുന്ന ദിനം തന്നെ വീടും, ഒരു നായയേയും ഇങ്ങാരെ ഏല്‍പ്പിച്ച് ചേട്ടച്ചാരു വിയറ്റ്നാമിലേക്ക് പോകുകയാണു, സകുടുംബം എന്തോ ബിസിനസ്സ് ആവശ്യത്തിനു. എന്താവശ്യത്തിനും ധൈര്യമായി വിളിച്ചോളൂ എന്നു പറഞ്ഞ് അസിസ്റ്റന്റിന്റെ ഫോൺ നമ്പറും കൊടൂക്കുന്നു അനിയനു. അസിസ്റ്റന്റ് ഒരു സുന്ദരി ആണു, വളരേ ഡെഡിക്കേറ്റഡ് യങ്ങ് സിംഗിൾ പെൺകുട്ടി. ആ കുട്ടിയും ആയിട്ട് ലവൻ ലൈൻ{?} ആവുന്നതാണു കഥ. ആ കൊച്ച് വളരെ നന്നായിട്ടുണ്ട്.  പടം എനിക്ക് ആവറേജ് ആയിട്ടാണു തോന്നിയതു - പക്ഷെ മിക്ക റേറ്റിങ്ങ് സ്ഥലങ്ങളിലും 65%ൽ അധികം റേറ്റിങ്ങ് ഉണ്ട് ഈ പടത്തിനു. 

അതോ  ഞാൻ ചിരിക്കാൻ മറന്നു പോയിക്കൊണ്ടിരിക്കുകയാണോ? ഇതിനു മുന്നേ യൂറോട്രിപ്പ് എന്ന പടവും - അതെ കോമഡി തന്നെ - ഞാൻ കണ്ട് ഇഷ്ടപ്പെടാതെ പോയ്യിരുന്നു. പക്ഷെ അതിലെ ചില നല്ല ചിരികൾ ഞാൻ ആത്മാർഥമായി ചിരിച്ചിരുന്നു, പടം ചവറായി തോന്നിയെങ്കിലും!. അപ്പോൾ ഞാൻ ചിരിക്കാൻ മറക്കുന്നതാണോ? അതോ .. എന്റെ മൂഡിന്റെ കുഴപ്പമാണോ? 

ആവുമായിരിക്കും അല്ലേ? നോക്കാം. :)


Tuesday, August 31, 2010

യൂറോ ട്രിപ്പ് - EuroTrip (5/10)



English/Comedy/2004/(5/10)/IMDB
Rated R for sexuality, nudity, language and drug/alcohol content.

പടം കണ്ടൂ.
നായകൻ ഈമെയിൽ വഴി ഒരു ഫീമെയിലിനെ അതും യൂറോപ്പിലെ മസാൽദശ ഫീമെയിലിനെ പരിചയപ്പെടുന്നു, ആ ഫീമെയിലിനെ കാണാൻ ആ മെയിൽ(Male)  മൂന്നു മെയിലും രണ്ട് ഫീമെയിലും ആയിട്ടുൾല ഫ്രണ്ട്സും ആയി ബർളിനിലേക്ക് പോവ്വാണു. അതിനിടയിലെ മണ്ടത്തരങ്ങളും സാ‍ഹസങ്ങളൂം മറ്റും ആണു കഥ. അഞ്ചെട്ടു സ്ഥലങ്ങളിൽ ആത്മാർത്ഥമായി ചിരിക്കാനുണ്ട്, ഒന്നൊഴികേ എല്ലാ ഫീമെയിത്സും തുണീ അഴിക്കുന്നുണ്ട്, ആകെ മൊത്തം ഒരു ചിരി-മസാല പടം. 

വേറോന്നും കാണാനില്ലാ എങ്കിൽ കാണ്ടോളൂ  :)

വാൽക്കഷ്ടം : ഞാൻ നോക്കി ഇരുന്ന ഫീമെയിൽ മാത്രം തുണീയഴിച്ചില്ല. :(  അല്ലേലും ഈ മുതലാളിത്ത വ്യവസ്ഥിതിയേ ശരിയല്ല - നമുക്കാവശ്യമുള്ളതു ഒരിക്കലും തരില്ല!


വിനയന്റെ യക്ഷി ..


ഇപ്പോൾ ദുരന്തങ്ങളുടെ സീസൺ ആണേന്നു തോന്നുന്നു .. പാക്കിസ്ഥാനിൽ പ്രളയം, കാശ്മീരിൽ മേഘസ്ഫോടനം, ഫിലിപ്പൈൻസിൽ അഗ്നിപർവ്വതം, കേരളത്തിൽ വിനയന്റെ യക്ഷി ....

ഇതിലും വലുതെന്തോ വരാനിരുന്നതാ .. ഇത് കണ്ണിൽ കൊള്ളാനിരുന്നതു പുരികത്തിൽ കൊണ്ടു എന്നു കരുതു സമാധാനിക്കാം .. (എന്നാലും ഇതിലും ഭേദം പ്രളയം ആയിരുന്നു. )


Sunday, August 29, 2010

പ്രിൻസ് ഓഫ് പേർഷ്യ - Prince of Persia: The Sands of Time (5/10)


English/2010/Action-Adventure/IMDB/(5/10)
Rated PG-13 for intense sequences of violence and action.

പ്ലോട്ട് :  ലോകത്തിന്റെ അങ്ങേ അറ്റം മുതൽ ഇങ്ങേ അറ്റം വരെ നീണ്ട് നിവർന്നു ഏമ്പക്കം വിട്ട് കിടക്കുന്ന പേർഷ്യൻ സാമ്രാജ്യത്തിലെ സുൽത്താൻ, അങ്ങേർക്ക് ഒരു അനിയൻ, രണ്ട് മക്കൾ. ഒരു ദിവസം വഴിക്കരുകിൽ വച്ച് അങ്ങേരുടെ തന്നെ പട്ടാളക്കാരെ ഇടിച്ചിട്ട് ഓടിയ ഒരു അനാഥബാലനെ (ലവനാണു നായകൻ) അങ്ങാരു കൊട്ടാരത്തിൽ കൊണ്ടു ചെന്നു മകനെ പോലെ വളർത്തുന്നു. അവർ വളർന്നു വലുതാവുന്നു - അവർ ഒരു പുണ്യ പട്ടണം ആക്രമിച്ച് കീഴടക്കാൻ ശ്രമിക്കുന്നു. മൂത്ത പ്രിൻസ് ആജ്ഞാപിക്കുന്നതിൽ നിന്നും വിപരീതമായി നമ്മുടെ അനാഥ പ്രിൻസ് വളരേ സാഹസികമായി ഒറ്റക്ക് പട്ടണം കീഴ്പ്പെടുത്തുന്നു! (ബാക്കി പട്ടാളക്കാരെ ഒക്കെ പിരിച്ച് വിട്ട് അത്രേം ശമ്പളം ലാഭിച്ചേനെ ഞാൻ ആയിരുന്നു രാജാവെങ്കിൽ.)  അവിടെനിന്നും കിട്ടുന്ന ഒരു കഠാര കഥയുടെ ദിശ വീണ്ടും മാറ്റുന്നു. തൂണിലും തുരു‌മ്പിലും ഒന്നുമല്ല, പക്ഷെ ആ കഠാരയിൽ ആണു  ലോകം തന്നെ ഇരിക്കുന്നതെന്നു നമുക്ക് പിന്നീടേ മനസ്സിലാവൂ. ... ഇനീം ഞാൻ പറഞ്ഞ് കാണാൻ ഇരിക്കുന്നവരെ കൂടെ ചന്തിക്കടിച്ച് ഓടിക്കണില്ല, കാണു, അനുഭവിക്കൂ.

വെർഡിക്ട് : ആദ്യം നല്ല കാര്യങ്ങൾ : നല്ല ആക്ഷൻ, നല്ല റോപ്പ് ട്രിക്ക്സ്, ഗ്രാഫിക്ക്സ്, റെൻഡിഷൻ എന്ന പടത്തിൽ അഭിനയിച്ച പയ്യൻ ഇതിലും നന്നാക്കിയിട്ടുണ്ട്(എന്തോ ഗില്ലറ്റിൻ എന്നോ മറ്റോ ആണവന്റെ പേരു, ഞാനിന്നു നാക്കു വടിച്ചിട്ടില്ലാത്തതു കൊണ്ട് ശരിക്ക് ആ പേരു എഴുതാൻ പറ്റണില്ല), ബെൻ കിങ്ങ്സ്ലി റോൾ തരക്കേടില്ലാതെ അഭിനയിച്ച് ഫലിപ്പിച്ചിട്ടുണ്ട്, നായിക പെയ്മെന്റ് സീറ്റ് ആണെന്നു തോന്നുന്നു - നായികയുടെ മുഖത്ത് വികാരം വാരിവിതറപ്പെടണമെങ്കിൽ  ഇനിയും കോറേ ജന്മങ്ങൾ ജനിക്കേണ്ടിയിരിക്കുന്നു എന്നു തോന്നുന്നു, നായായും, നരിയായും, പിന്നെ നരനായും!. 


ആദ്യമൊക്കെ സംഭവം നന്നായിട്ട് പോയി, പക്ഷെ സമയം കഴിയുന്തോറും ബോറായി തുടങ്ങി.ഹല്ലേ കേൾക്കണേ കഥ .. നല്ല പൊതിരെ അടി നടന്നോണ്ടിരിക്കാണേ .. ഇടിയിൽ തോറ്റാൽ ഞാനും നിങ്ങളും എന്റെ അപ്പുറത്തെ വീട്ടിലെ സൂസിയും അടക്കം സകലരും തവിടൂ പൊടിയാവും എന്ന സ്ഥിതിയാ  .. അപ്പഴാ ദാണ്ടേ നായകനും നായികക്കും കൂടെ മുട്ടൻ കിസ്സിങ്ങ് .. ഹോ .. എനിക്കിത് ഇതു കാണു‌മ്പോഴാണൂ ചൊറിയണതു...ഇവനൊക്കെ ഒരു ഉത്തരവാദിത്യമുണ്ടോ? ഹോളിവുഡാണു പോലും ഹോളിവുഡ് !

അതു പോലെ നായിക തൂങ്ങിക്കിടക്കുന്നു നായകന്റെ കൈയ്യിൽ, താഴെ കൊക്ക .. നായിക : വിടൂന്നേ, പൊയി ലോകത്തെ രക്ഷിക്കൂ ..നായകൻ : വിടില്ല ചക്കരേ .. വിടൂ .. വിടില്ലാ ... വിടൂ .. വിടില്ലാടീ ... ഗർ‌ർ‌ർ .... ഒന്നു വിടടാ പേട്ടു ചെക്കാ, സൂസി ഇപ്പ ചാവും അപ്പഴാ അവന്റെ പിള്ളെരു കളി എന്നു എനിക്ക് ചൂടായി പറയേണ്ടി വന്നു, കൈ വിടാൻ .. അത്രേം നേരം ഈ കളിയായിരുന്നു ലവരു രണ്ടും കൂടെ - അവനറിയാം, അവന്റെ കൈയ്യിലെ കഠാരയുടെ സ്വിച്ച് ഞെക്കിയാൽ (അതെ, അന്നും ഉണ്ടായിരുന്നു സ്വിച്ചും ട്രിഗറും, റിമോട്ടും ഒക്കേ) എല്ലാം പഴേ പടീ ആവുമെന്നു, അപ്പഴാ അവന്റെ സെന്റി!. ഇഡിയറ്റ് - ഇവനെ ഒക്കെ സിനിമയിൽ എടുത്ത ഗീർവാസീസ് ആശാനെ പറഞ്ഞാൽ മതിയല്ലോ!.


അല്ല, എനിക്കറിയാൻ മേലാഞ്ഞിട്ട് ചോദിക്കാ, ഇത്രേം കാശു മുടക്കി പടം പിടിക്കുവാണു, ഒരു ഹിറ്റ് ഗെയിമിനെ ബേസ് ചേയ്ത് പടം പിടിക്കുവാണു, ഗ്രാഫിക്ക് ആർട്ടിസ്റ്റുകളെയും കുതിരകളേയും വാളും പരിചയും പപ്പടം കുത്തിയുംമൊക്കെ കാശു മുടക്കി പൊക്കറ്റിൽ ആക്കിയിട്ടുണ്ട് - എന്നാ പിന്നെ ഒരു മര്യാദക്കുള്ള സ്ക്രീൻപ്ലേ കൂടെ സംഘടിപ്പിക്കാമായിരുന്നില്ലേ? മനുഷ്യനെ വടീയാക്കാൻ ഒരു പത്തു ട്വിസ്റ്റും കുത്തിത്തിരുകി ഒരു പടവും പടച്ച് ഇറങ്ങിക്കോളും ഓരോലവന്മാരു ...  ഡിസ്നി ആണു പോലും! ഡിസ്നി.!

നിങ്ങളും കണ്ടു നോക്കൂ, ചിലപ്പോ ഇഷ്ടപ്പെട്ടേക്കാം, ഞാൻ പറഞ്ഞില്ലേ, നല്ല ആക്ഷൻ ഒക്കെ ആണു - കഥ മാത്രം നോക്കരുതു. കാണൂ കണ്ടഭിപ്രായം പറയൂ.